經濟客飯：學童需要長壽教育

【蘋果日報】上星期寫小學劣食飯盒，令我想起廿幾三十年前學生時代食過落肚的東西。小學的小食部，提供不知名即食麵加顏色鮮艷紅腸，念及小孩喜歡食鹹，更有醬油一大支任倒，要幾鹹有幾鹹。上到中學，又記得隔兩條街有一檔（相信是非法的）流動餐車，12元三餸連高糖飲品，餸大多是煎炸肉類，畫龍點睛是有幾大桶燒汁、黑椒汁之類的液體任淋，要幾濕有幾濕。
根據教育局的指引，我中小學食過的東西九成九不合規格。
我唔敢講今日的香港小孩學習得比我這一代好，但我幾肯定今日食三低劣食的香港小孩會比我這一代長壽。一來細細個已經被迫養成健康的飲食生活習慣，二來科技進步又會令我們冇死得咁易（例如剛出爐的諾貝爾生理學或醫學獎），今日的小學雞平均預期壽命比我們這一代長幾年唔出奇。
所以除了好重要的飲食教育，香港學生更要及早明白一個事實：你好有可能會好長命㗎！做退休金的朋友同我講，原來根據調查，香港人普遍估自己早死，早過統計數字所顯示的預期壽命一截。若果實情真的如此，正確觀念就要及早灌輸：你要計劃的「生涯」不是五六十年而是七八十年，一方面投資要更長遠，但一方面又有更多時間失敗從頭再來。
曾國平
美國維珍尼亞理工大學經濟系副教授
http://fb.com/economics3.0/
本欄逢周五刊出