前戰友斥無所不用其極 劉慧卿：馮檢基想劉小麗死

【蘋果日報】【九西補選】立法會前議員馮檢基執意在劉小麗未被DQ前報名參選，受千夫所指。馮昨日聲稱是要挑戰保皇黨和「欽點Plan B」，反咬民主派食言不搞初選是「由民主變不民主」，又稱曾指3.11補選「最後一擊」是判斷上錯誤。民主黨前主席劉慧卿直指「唔係大家認識嗰個馮檢基」，質疑馮參選或「想劉小麗或者李卓人死」。連上次區選中被馮指控鎅走其選票的前民協黃仲棋痛斥馮為參選無所不用其極。
記者：呂浩然　林俊謙　陳嘉裕
前日立法會九西補選提名期開始，除代表民主派出選的劉小麗外，馮檢基同日報名。事後被多方指摘的馮，昨接受商台訪問被翻舊賬。商台播放今年3.11補選期間，馮受訪時揚言該次補選是他「最後一擊」的錄音，質疑馮如今反口。
馮拒認違諾，辯稱並非在價值觀如民主理念有變，而是覺得民主派3.11補選有搞初選，今次沒有，「點解非建制派可以食言？」，「由民主變不民主喎！」他又強調其「最後一擊」論是基於若在上次補選中當選，自然不會參與今次補選，反之若他在3.11補選落敗，就不會參與今次補選。
「最後一擊論判斷出錯」
被再三追問下，馮才承認「最後一擊」論是「判斷上嘅錯誤」，他願就此道歉，同時堅持今次參選目的是挑戰保皇黨和「欽點Plan B」。
月前在網台為訪問馮會否參選而大動肝火的劉慧卿，昨評論馮決定參選時直言，「我真係覺得馮檢基好奇怪」，「大家都覺得嗰個唔係大家認識嗰個馮檢基嚟，以為佢已經係轉咗㗎嘞」，劉續說，「咁轉咗係為乜呢？可能就係想劉小麗或者李卓人死啦，咁點解係咁呢？就真係唔知」。劉重提月前網台節目中，馮被多次追問都不講明意向，「其實無緊要㗎，你光明正大，想選咪選囉，但你猛咁話未決定，其實個心已經好想選，咁畀明眼人望落去，都知佢想選啦！」
如今馮被視為鎅票者，其實他也嚐過被鎅票滋味。2015年區選中，馮於深水埗區麗閣尋求連任，面對工聯會小花陳穎欣挑戰，豈料昔日戰友黃仲棋入閘，分票下令馮痛失議席。黃仲棋接受《蘋果》查詢評價馮今日所為時形容，馮為參選無所不用其極，斥責馮「制度對你有利就哈哈接納，依家為出選就鬧制度不是」。
黃當時一度被馮檢基描繪成鎅票王、「被人動員出嚟」，黃直言現在的馮與其當日角色相似，「當日佢（馮）就係民主派協調機制下嘅候選人，我想出選，但傾都無得好傾，嗰時又唔見佢爭取初選？好可笑」。當年黃亦遭多方指摘甚至粗言問候，他覺得「機制就係機制，嗰時佢（馮）爭取連任有優先，咁我真係機制以外」，「機制都係拎最大公約數，所以就算泛民當時冇支持我，我對泛民都係一句批評都冇」。