觀眾入場要對名Eason摩天輪開免費騷

【蘋果日報】陳奕迅（Eason）前晚現身商台與DJ細So主持《1872陳奕迅》，Eason宣佈將於下月27日，聯同the duo band在中環摩天輪舉行一場慈善音樂會，所有門票不會公開發售，只會預留少量門票給電台聽眾。
請教明福俠
Eason說：「因為我應承咗要回饋番香港，所以呢個騷係唔會賣飛，不過喺程序同技術上有好多嘢好煩，本來真係諗過捐錢就算，點知突然場地嗰邊又話得喎，真係皇天不負有心人，到時會邀請慈善機構嘅受惠者，一齊喺摩天輪下面睇騷。」他還笑說：「今次我係喺核心內圍開騷，不過內圍同外圍呢啲嘢，要問吓明福俠先得，多謝佢啲月餅，好正，從來未試過收到明福俠嘅月餅。」
之前Eason曾經講過希望可以關注患情緒病的人，但今次考慮到聲量可能造成影響，所以會再安排其他活動，他說：「其實個場地只係容納千幾人，嚟睇騷嘅全部都係年輕人，到時入場要對名，香港可能有啲人係冇時間，又或者冇能力睇騷，所以想畀佢哋一啲正面嘅選擇。曾經有諗過不如set啲門票係賣出去，之後將錢捐番出去，但係最後決定全部唔賣飛，唔想講錢。」
件事好過癮
不過今次開騷所動用的人力物力都有一定數目，Eason坦言：「呢件事係好過癮，你當今次做啲實驗性質嘅嘢，只要我哋用心做好啲好細微嘅嘢，心存好事，正能量就會散播開去，總之成件事唔想講錢，做得開心就冇問題。」他更笑說：「遲啲會做番啲好商業嘅演唱會，當係平衡吓收支，搵番餐晏仔都冇問題。」
此外，莫文蔚昨在金鐘出席鞋履展覽，對於Eason自資開慈善騷，她大讚：「我同屋企人都成立咗個慈善基金，都想做多啲嘢去幫大家。」
採訪、攝影：盧妹