Cafe老闆憂業主大幅加租

【蘋果日報】三年前承租官涌街10號地舖經營咖啡店Colour Brown Cafe的老闆李健明（Edwin）深明人流多租金貴的道理，當年由西貢進駐官涌街，無非貪此處租金不算貴。高鐵通車在即，心情矛盾，既希望帶來人流，卻生怕人流多，租金都會加得好緊要。
曾於電視台做製作的Edwin於2005年創業開咖啡店，租用西貢一個約350方呎地舖，三年前決定轉移陣地，「十年啦，（西貢）幢屋又有返咁上下歷史，好多甩漏，例如塞渠、跳電，再租可能要花好多錢裝修，於是想出市區，睇下生意可唔可以穩定啲。」搵舖由深水埗搵到尖沙嘴。
2015年以約6萬元承租官涌街10號地舖，建築約1,000方呎，「睇到呢個舖啱心水，空間夠，租金唔算好貴，當然比西貢貴少少。當年完全冇諗過有高鐵呢件事，由租呢度開始到現時，高鐵都未話炒得好熱。」
舖位剛續租有冇加租？他回應：「始終高鐵未通車，加幅唔算好高，所以你見到我地仲喺度。（租金加幅有10%嗎？）差唔多，仲可以頂得住。我諗業主仲觀望，唔會因為有高鐵炒作而加租加得太緊要，係合理加幅。當然日後業主睇到忽然人流好多，始終會喺租金到反映。」