蘇永康家爆玻璃囝囝避劫

【蘋果日報】蘇永康、蔡一智、周勵淇和張玉珊昨日到油塘出席長者活動，向公公婆婆派發月餅，其中蘇永康表示颱風「山竹」襲港時，正身在加拿大登台：「老婆喺屋企一早做好防風措施，不過應該黐漏咗塊露台玻璃，所以當日晏晝俾風吹爆咗，好彩當時囝囝喺房，老婆同外父即刻用啲紙皮頂住先。」 除爆玻璃外，單位亦一度停水，幸好現在已全部回復正常。
蘇永康又稱返港期間見到周圍仍然有很多塌樹：「其實香港實在太大根本做唔切，民政事務處佢哋其實已經做得好好，而且今次風災冇造成重大傷亡真係不幸中嘅大幸。」另外，蔡一智就表示於颱風期間碰巧囝囝發燒，四處求醫無門：「冇辦法啦，惟有幫佢搽油、飲水幫佢降溫，不過冇乜大礙，噚日已經睇咗醫生啦。」
採訪、攝影：曹家誠