中環在線：金管局搵朱咪咪做宣傳

【蘋果日報】為咗配合「轉數快」推出，金管局搵嚟非常精靈嘅朱咪咪，同埋徐天佑拍咗條片做宣傳。片頭就講咪咪姐追「家用」，遇着衰仔諸多藉口，百般推塘，不過咪咪姐見招拆招，當然追到家用啦！
咪咪姐演技好就不在話下，編劇夠寫實嗰吓至抵死，徐天佑話「我哋用唔同銀行」、「轉頭落樓下撳錢畀你」、「今日星期日喎」、「我唔記得你戶口號碼」，呢啲「拖數」藉口，華華覺得呢啲情節似曾相識，仲月月上演㖭。
面對呢啲無新意嘅理由，咪咪姐搬出一個「轉數快」就搞掂晒，追數話咁易呀！「轉數快」勝在全天候都做到即時轉賬，接合咗主要銀行同埋儲值支付工具營運商，方便易用，連咪咪姐都用到，仲識過數畀陳師奶、梁太等等，睇嚟唔單止係天下父母收家用恩物，P2P小額轉賬都一樣得！
李華華
LiWaWa@AppleDaily.com