揚言礦機「加鹹」增收益

【蘋果日報】「幣少爺」為了催谷聽眾落叠，除了大唱Filecoin將是Bitcoin翻版，還吹墟自己有個發達大計，待Filecoin明年上線，便會替客人的礦機注入「鹹片」內容，帶動礦機收益增加。
「調控交畀官方諗」
黃鉦傑說得興起，透露他的公司正與一些成人影片收藏家商談，日後或會買入他們多年來的珍藏，再把內容上傳到客人的礦機之中，「梗要（鹹片）啦，最短時間可以拎到一堆客入嚟」，他又表示，由於用戶看色情影片的習慣是「跳住嚟睇」，因此還需要注入美劇等類型的內容，「內地人好鍾意睇，尤其係《紙牌屋》」，吸引用戶下載更多礦機中的內容，增加礦機因提供檢索服務而產生的收益。不過，黃承認仍未在色情影片來源方面有着落，「依家都不斷尋求緊、傾緊合作……透露咗出嚟，我傾唔成」。
在課堂中，黃鉦傑又向聽眾派定心丸，聲稱不必擔心礦機存有不當內容而遭執法機關檢控，因為IPFS會先把檔案分割成大量碎片，然後分派到不同的礦機儲存，因此執法機關難以針對個人礦機來舉證。他又安慰聽眾，指網絡上本來就有大量不當內容，包括毒品販賣渠道、斬首影片等，IPFS並非源頭，只是加快互聯網的整合，「要有乜嘢手段調控，呢啲真係交畀官方諗喇」。