經濟客飯：連鎖店贏在平平無奇

【蘋果日報】我是每次出街食飯都做定功課的麻煩友，看網上評論又好，問朋友又好，要確保值得一試才會幫襯。這行為其實符合需求定律：每年只有幾個月在香港，在這個美食天堂的每一餐都相對珍貴，「食錯嘢」的代價沉重，選擇自然就謹慎起來了。
於是乎，我在香港很少幫襯連鎖店，多數去一些特別又吊腳的地方。
存在即合理，連鎖店遍佈香港總有原因。行入香港一個普通商場，總有伴你成長的幾間快餐店，有集團式經營的中式酒家，有看似獨特但原來都是同一個老闆的西餐廳，唔少得的就當然係兩大連鎖咖啡店其中一間。行商場沉悶，正因為舖頭來來去去差不多，好易行到厭。
連鎖店的價值，正正就係夠悶：食物質素普通，服務態度咁上下，連室內裝修設計都同一風格，顧客未入到去都大概估到會有一個如何的體驗。例如我去某快餐店食個豬扒飯，我知道不會好食到「嘩」一聲叫出嚟，但也不會難食到不能下嚥。平平無奇夠predictable，其實節省了顧客的訊息費用，不用預先做功課（你估個個好似我咁得閒），唔使煩唔使諗，方便得閒死唔得閒病的香港人。換個左翼煽情講法，「地產霸權」一方面迫使香港人努力工作，同時又助長「連鎖店霸權」，好惡毒呀！
曾國平
美國維珍尼亞理工大學經濟系副教授
http://fb.com/economics3.0/
本欄逢周五刊出