水樽含菌1,725萬個　污糟過商場廁板　擰蓋式最驚嚇

【蘋果日報】不少人都有自備水樽的習慣，但水樽若沒有恰當清洗，隨時比廁所板更污糟。《蘋果》邀請8人試用4款不同種類的水樽一周，另到沙田新城市廣場採集女廁廁所板的樣本，結果發現，8名測試者使用的水樽含菌量均高於廁所板。有學者表示，若想水樽保持乾淨，應每天徹底清洗。
記者：李雨夢
《蘋果》邀請8人試用4款市面常見的水樽，包括揭蓋式、擰蓋式、吸啜式、吸管式，測試者使用全新的水樽一周，當中有一半人完全沒有清洗水樽，另一半則每天簡單以清水清洗。一星期後，本報將8個水樽交到香港高等教育科技學院（THEi）食品與健康科學學系化驗，調查水樽瓶口飲用位置的含菌量。結果顯示，含菌量最高為擰蓋式水樽，測試者阿淳的樣本總菌量為1,725萬個（CFU），是所有測試者中最高；含菌量最低則為吸啜式水樽，測試者李康廷的樣本測出總菌量為1,055個（CFU）。
擰蓋位較難清洗
THEi食品與健康科學學系亦曾抽驗學校裏的廁所板，結果發現總菌量只有雙位數字。《蘋果》再委託佳力高試驗中心到人來人往的沙田新城市廣場，採集女廁廁所板樣本檢驗。化驗結果顯示，該廁所板的總菌量只有40個（CFU），遠低於今次測試的8個水樽。家庭醫生林永和表示，廁所板驗得低菌量可能跟定期清潔有關，「我估係因為有做清潔，如果廁板唔抹都一定會有好多菌，因為人體皮膚都會有細菌」。
香港高等教育科技學院食品與健康科學學系特任導師黃浩賢指，擰蓋式水樽驗出較高含菌量跟其面積有關，「見到擰蓋嘅面積比較大，同埋有啲位置比較難清洗，我哋口部掂到呢啲位置，飲完之後閂返個蓋會保持濕潤狀態，如果長時間懶洗，就會難清洗，咁細菌就會比較多」。吸啜式水樽含菌量較低，黃解釋：「呢啲樽飲用嘅位置暴露喺空氣中，長時間處於乾燥狀態，可能因為咁而少啲細菌。」
細菌或來自口腔
黃浩賢指，每個人使用水樽的習慣都不一樣，「使用頻率同清洗頻率都會影響含菌量，出現細菌嘅原因可能係口腔有細菌，飲用時帶到去水樽口，另外就係環境嘅細菌，水機或者水喉水都可能會令細菌走咗入去」。
家庭醫生鄭志文指高含菌量或影響健康，「要睇返係咩菌種，如果係致病嘅菌種，飲咗落去可能會影響腸胃」。鄭志文表示，出現這樣的情況主要跟清潔有關，「可能有人唔會洗水樽，可能有啲水樽嘅設計令人難清洗，我哋本身口腔都會有細菌或者食物殘渣，有時用手抹個樽口，都會將啲菌帶咗入去，加上如果個環境濕，細菌就會繁殖滋生」。他又指，抵抗力較弱的人會更容易受細菌感染。