「俞琤鍾意下屬同佢拗」

【蘋果日報】陳志雲兩度於商台工作，90年代初由政府跳槽到商業電台，其後轉職無綫，再回到商台。走進現任商台首席智囊陳志雲的辦公室，談到當年一手由政府「撬」他過檔的俞琤，「YT（俞琤）搵一個人入嚟做嘢，我相信佢係好多方面嘅觀察」。陳志雲解釋，因為俞是一個思想透徹的人，「如果係佢自己搵返嚟嘅工作夥伴，佢會有好細心嘅觀察，呢點我都喺佢度學到好多嘢」。
俞琤喜歡下屬「同佢拗」，最重要的是有道理，陳志雲回憶當年俞琤掌管的商台，「每逢商台有乜大動作，未出我都一定知……佢把聲一定沙晒！」她就是會與人辯論，給予相反意見。
公司不應排資論輩
他回想起當年，「我記得有一次，唔知兩三點，已經凌晨好攰，佢（俞琤）都已經說服晒我喇，但佢忽然又話，唔係喎你頭先講嗰點可能有啲道理，我話，唔係吓嘛，又嚟過？」這樣就可以從「一堆糞便中搵到一粒鑽石」。
作為管理層要有謙卑的心，這亦演化出陳志雲的管理哲學，明白知人善任很重要，「作為一個管理層，越高級就越要知同事嘅長處，盡量要搵出同事嘅特性」。與此同時，「每一個人都有短處，咁就要用其他人去彌補佢」。
他認為，一個叻的老闆除知人善任之外，亦不應排資論輩，可以破格提升，這有三個好處，一是可以刺激有能力的同事，二是培養機構內的互相競爭文化，三是破格提升的人會對老闆忠誠，因為是老闆一手提攜他的。下屬升職加薪亦是管理層面對的難題，「如果要我出聲加人工，我唔會開心」。陳志雲說：「如果員工要出聲同你講加人工嘅話，我諗你都要檢討吓點解要佢出聲。」
人才流失亦是問題，「咁我先要了解佢點解想辭工，睇下佢原因，有冇嘢做到令佢有意留返喺度。如果真係冇嘅都冇辦法，惟有希望第日喺唔同範疇大家可以再合作」。不過，他認為作為管理層「都要問自己點解你唔知佢想走」，「如果你做最高管理層，你永遠需要自己先問責，點解佢要同我講（辭職）？佢嘅表現我自已觀察得唔夠？先要問咗自己。同埋溝通好重要，會事半功倍」。