張繼聰呻老竇之苦

【蘋果日報】張繼聰與衛詩雅日前為電影《告別之前》接受本報專訪，兩人在電影中飾演夫妻，要面對戲中患血癌女兒帶來化療痛苦及生活壓力。衛詩雅要在戲中做人妻，笑言多謝謝安琪（Kay）做軍師：「阿Kay話我知，陀住BB嘅感覺係點，當小朋友有病，父母會有幾緊張。」
在戲中，阿聰要陪患病女兒在醫院走最後一程，他說：「我拍呢套戲時個女未出世，如果個女出咗世，我諗我未必拍。每日一roll機，就要進入狀態，每日都好痛苦。」提到子女，阿聰說：「阿仔試過有次病，我直頭想死。嗰時老婆陀住個女，每次驗乜等報告都驚。我二十幾歲時睇過一套韓片《原罪犯》，戲入面個老竇為咗個女剪咗條脷，到我個仔出世時，幫佢剪臍帶，我諗起呢場戲，明白父母會為小朋友不顧一切。」
採訪︰羅婉玲
攝影︰仇志德
場地提供︰HOTEL VIC on the Harbour