會師中環：解讀報表係基本功

【蘋果日報】八月係中期業績高峯期，投資者自然要追到實，睇睇公司盤數有冇問題。但以公告所披露的覆蓋範圍及複雜程度，其實連會計師都未必能全部解讀，所以普通散戶通常都只聚焦某幾個數字，如銷售額及盈利等。不過有不少業餘投資者，隨時連重點數字都未必睇，只靠各大財經Apps送上的業績速遞就當睇咗業績。
不過，有時候唔同媒體嘅業績速遞都可能唔同，以剛剛發佈中期業績的中銀香港（2388）為例，我就見到有兩款標題，分別係「中期多賺0.2%」同「核心多賺18%」。如果散戶欠缺基本會計財務知識，其實係連盈利持平定上升都未必搞得清。事實上，以上兩個標題都正確，只不過前者計整體盈利，並無除去上年出售集友的影響，而後者則只計算剩低持續業務的增長。係呢個情況下，不論係預測來年盈利或係用於估值模型的計算，都係以後者嘅增長百份比係更為有用，因為佢係預示緊將來嘅盈利增長，而前者增長率只是一次性，並唔能夠反映業務前景。
由此可見，作為投資者，擁有基本嘅報表解讀能力係必須，否則只靠新聞或最簡單嘅總體盈利數字，係連公司表現好壞都睇錯。可惜嘅係，甚少散戶會進修會計財務知識，相反他們更願意花時間去捕捉短期走勢的技術分析，基本功不穩，結果自然係輸錢收場。
神仙丁
《審計搵丁》負責人
http://facebook.com/AuditSlave/
本欄逢周五刊出