金手指 ：香港高人何其多

【蘋果日報】孫柏文成日覺得，真係要搞一個「財經高人獎」。呢個獎，仲要係不定期咁頒，例如，當年能夠氹掂政府，唔以公開拍賣方法批數碼港塊地，之後慫恿到當時全港最有公信力嘅民主派議員肯定公司「有特權」嘅嗰位仁兄。又或者07年說服曾俊華，令政府已控港交所（388）董事局任命權下，都無啦啦入股，兼令中央話考慮「資金自由行」嗰個。
講咁多，當然係呢期我覺得呢個「財經高人獎」，又有實至名歸嘅人出現啦。邊個？就係新昌（404）單嘢嘅魔術師。
新昌單嘢其實好簡單，一間公司，借咗好多錢，跟住向大股東買咗好多umm...「好嘢」。跟住啲「好嘢」冇想像中咁好，唔夠現金流還債。啲錢，就大股東袋袋平安了。成單嘢嘅關鍵，當然係邊個搞到新昌可成功借咁多百億。睇番港交所紀錄，當年新昌CFO就係喺友報執筆寫專欄嘅彭沛然。新昌舉債係咪佢搞？唔知。不過佢一定係高人，因為當年佢in我，叫我唔好跟佢，叫我去做分析員。彼邦傳來消息，話Tesla擱置買斷小股東私有化計畫。其實，「邊個會畀錢個老細用天價買呢件『好嘢』呀？」Elon Musk真係要來香港搵彭沛然問路。問完，就應該可私有化Tesla。
孫柏文
獨立股評人
http://fb.com/shuen
本欄逢周二刊出