故事之王︰做唔成金庸 做個網紅也不錯

【蘋果日報】不同平台的網絡連載創作多如繁星，造就一代網絡作家，初中已寫12萬字小說投稿到台灣參加比賽，多年來均名落孫山，但無阻創作欲望，網絡作家劉晡照（金仔）不諱言，是自由的網絡平台，造就了他完成作家夢。自2016年在討論區免費連載原創小說大受歡迎，短短兩年間，23歲的他已出版了5本實體小說。用心經營個人網頁，與網友互動溝通，以網絡互動輔助小說營銷，他承認自由的平台造就機會，但隨之而來的泥漿戰卻無日無之。「真係頂唔順，就用創作回應好了，我最討厭嘅就係筆戰同舌劍唇槍。」新一代港產故事之王如是說。
「香港有幾多個金庸吖？」這是昔時金仔媽苦口婆心的「一盆冷水」，但這個自小參加寫作比賽屢敗屢戰的年輕作家，卻笑言不單沒被擊退，還成了他繼續寫下去的動力。「我喺高登連載小說時，專登改名叫做金庸的男人，你話我做不了，我就以此為目標，朝住呢個方向努力。」暫時未能做到金庸第二，但做個「網紅」怕且也不錯，儘管，金仔其實比很多人都清醒：你寫10個古仔都未必有一個會紅，到你紅咗一個，下一個又可能唔得。
既然結果不由人，那就多想無謂，自言創作隨心的他，笑說不如享受過程。「12、13歲已想做作家，中一時用咗一個暑假寫咗個11萬7千字嘅小說，寄咗去台灣參加比賽，一路輸一路參加，直至前年我出書嗰年，連個比賽都冇埋。」屢敗屢戰屢戰屢敗，其他人或早自我質疑，他卻選擇在失敗中學習，只因自覺找到最愛。
「我會為咗寫小說犧牲睡眠時間，對我嚟講，瞓覺好緊要，細個基本上只鍾意瞓覺，但我會為咗寫小說，唔瞓覺捱通宵。」
創作慾望無窮，期望借比賽得獎出書的願望落空，他就在討論區發表故事，繼續日寫夜寫。「以前啲人鍾意寫小說，只能夠埋頭苦幹，寫完交畀出版社出版，但網絡平台唔同，你想寫就得，有人講門檻太低，所以好多垃圾作品，但我就覺得每個作品都係創作人嘅心血，門檻低容易入去但都要你有心，係咪可以有趣咁將想表達嘅訊息傳遞出去。喺網絡世界，讀者反應好直接，啲留言同正評，對創作人係好大嘅鼓勵，會成為好嘅養份，畀到你動力加速寫落去。」上年浸大畢業正式投身電影編劇行列的他說。