工聯會收財團捐款　鄭耀棠：有乜利益衝突？

【蘋果日報】《蘋果》昨日頭條報道，工聯會由2015至2017年間收入高達3.8億元，包括2.42億元不明來歷的「捐款」，但涉嫌將資金轉移避稅多達392萬元。工聯會榮譽會長鄭耀棠昨出席活動時，被問到事件是否屬實，他僅稱自己已卸任會內職務，不應指指點點，並稱「我唔係管財」。記者追問工聯會收受捐款的規模時，他重申不便評論。
稱財務狀況非秘密
再問及工聯會曾否接收財團捐款，鄭耀棠說：「肯定有啦……你用『財團』嘅字我好難評論，外面嘅捐款肯定有嘅。」他解釋外間捐款有來自社會、各個團體，「甚或我哋有啲會員，以前係打工仔，後來佢成為老闆，但佢對工會非常有感情，佢依然會對工會捐獻，呢啲情況係唔少嘅」。那麼團體是否包括商業機構捐獻？鄭重申，「我無法子掌握到邊個人捐過款畀我」，稱工聯會接受捐款的準則，就是無條件捐獻，「唔附帶任何要求」。
作為勞工階層組織收取資方捐獻，會否怕被外界批評存在利益衝突？鄭直言：「我驚乜嘢？有乜嘢利益衝突？代表打工仔唔等於唔可以接受（資方捐款）㗎嘛！」他稱每屆理事會都有向相關代表作出報告，難以三言兩語解釋財務狀況，「唔係一個秘密數字」。
■記者袁楚雙