【姐匙Talk】潛水哈哈排場誇過前輩

【蘋果日報】成日話娛樂圈啲人帶錢嚟打工，好多新人排場的確又勁過唔少資深演員，佢哋未紅就當自己係巨星幫。姐匙姐就聽聞過新人「潛水」同「哈哈」近日難得有機會拍劇，仲拍住資深前輩「瘦爸爸」，今次真係可帶挈佢哋入屋，唔知係咪呢個機會可一不可再，佢哋緊張到爆。
潛水之前叫做拍過幾部戲，戲份亦唔少，但係演技仲好幼嫰，今次喺前輩面前，當然仲係好green嘅新人，不過潛水恃住有少少知名度，就令佢覺得自己已經上咗位，加埋做咗幾年，但做極都係坐歪嘅哈哈，兩男竟然主意多多。
夾錢請專用化妝師
有工作人員爆料，潛水同哈哈原來好貪靚，雖然有劇組化妝幫佢哋執妝，佢哋務求以最佳狀態出鏡，仲特登夾錢請咗專用化妝師，貼身跟實服侍佢哋，只係為咗可以時刻補妝，保持個「靚」樣。
反觀同劇嘅瘦爸爸就冇潛水同哈哈咁貪靚，瘦爸爸都有個助手，但佢基本上妝都跟大隊安排，冇兩個新人咁姿整。論經驗講演技，瘦爸爸當然係經驗老到兼出神入化，根本唔需要用門面化妝去搶鏡，反而潛水同哈哈咁嘅做法，有啲未學行先學走。有時喺片場，佢哋資歷咁淺，但咁講究排場，畀人嘅感覺真係唔係咁好，台前幕後對潛水同哈哈呢個行為，都成大家茶餘飯後嘅話題。
撰文：Jessie
本欄逢周五刊出
【姐匙Talk】
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。