笑到最後：港鐵拖冧一帶一路

【蘋果日報】上星期一本欄建議特區政府施政報告盡派港鐵（066）股票予市民。隨後港鐵高層地震，其他沉降醜聞一一被《蘋果日報》爆出。港鐵3日內股價跌到一年新低，港股熊市是否確認言之尚早，港鐵股價率先自行走入熊市，危機已經爆發。
更大嘅危機係，國家正在發展一帶一路，鐵路係當中重要一環。中國跟沙地特阿拉伯早已就一帶一路及「2030願景」交流，發展中國至沙地阿拉伯的「沙中綫高鐵」，加強中國與中東地區經濟及能源發展，並非不可能。
中國香港係中國一部份，沙中綫及高鐵本來係一帶一路嘅示範單位，日後向其他國家提供同等價錢及優質嘅鐵路。港鐵出事，國際傳媒跟進「中國新聞」，外國人只會覺得「中國鐵路公司做嘢咁差」，一帶一路大計，隨時被港鐵拖垮。
要解決港鐵危機，必須要根本改革，換主席、換行政總裁、換工程總監都不足以改變港鐵，派港鐵股票換大股東已經成為解決港鐵危機嘅唯一出路。政府只係代市民持有港鐵，港鐵75.19%股份乃屬於市民，政府只係「人頭」。610萬名合資格收股港人，每人平均取得740股港鐵，約30,000元，即使對為口奔馳嘅市民實際作用不大，但派股票都算聊以慰藉，至少比過去幾任政府大方。
對港鐵而言，港鐵曾經係世界奇蹟，因為世界大多數鐵路蝕錢兼無效率，港鐵靠物業上蓋食糊，本來係香港軟實力輸出海外嘅發展機遇，今次港鐵危機隨時打亂國家一帶一路發展，成為我國崛起嘅絆腳石。
以往得政府一個大股東睇港鐵睇得唔足，若果政府盡派港鐵股票予約610萬名港人，610萬個大股東監察港鐵，以防有人破壞國家發展機遇。
高明
http://fb.com/bigricetea
本欄逢周一刊出