【馮仁昭四圍超】余媽媽：認到屋企人　余德丞好轉　可進食交談

【蘋果日報】現年28歲嘅無綫藝員余德丞（Dickson）日前踢波時突然暈倒昏迷，被送入瑪麗醫院深切治療部，曾一度危殆，好彩憑住驚人意志力同醫護人員嘅悉心照顧，日前Dickson已初步蘇醒。連日奔波進出醫院嘅余媽媽噚日下午再到醫院ICU探Dickson，問到阿仔情況，佢話：「可以傾偈，多謝關心。」之後再問到Dickson可以食嘢未，余媽媽如釋重負再答：「可以呀！」
之後，余媽媽就再向傳媒交代情況，多謝傳媒關心：「Dickson雖仍喺深切治療部，但已可以同家人溝通同認到晒所有家人，我哋一家都好感恩。希望Dickson一天比一天進步，慢慢進步穩定，可以調離深切治療部，但康復期仍有一段漫長道路，多謝大家關心。有更好消息一定會再話畀大家知。」
李雯希貼文道歉
此外，日前曾到醫院探Dickson嘅李雯希，以「代言人」身份交代病情狀況，之後俾網民狂插抽水，佢前晚喺Ig貼文道歉，話當日出自關心、衝口而出嘅行為鹵莽不智，向余媽媽同Dickson屋企人、經理人同前公司致歉，而噚日余媽媽被問到知唔知李雯希道歉一事，佢就點頭示意。
撰文：馮仁昭