冰說聰明：上市公司炒股損手

【蘋果日報】踏入八月業績期，今次業績期值得留意的，就是上市公司的投資成績。上半年個市創歷史新高後陰陰落，如果公司有玩股票，好大機會損手爛腳。
青冰一向對有炒股票的公司避之則吉，因為他們對投資股票的披露不足，買賣不一定即時通報，有時到出業績先知咩事，當然妖股互持的那些公司，可以不理，但近年的趨勢，就是上市公司又開始玩番股票掛鈎投資，掛的股票，全是大藍籌，看似穩健，但當恒指從高位回吐兩成以上，你就要開始擔心這些公司的投資是否有大額虧損。
永義國際（1218）係掛鈎投資的常客，從通告所見，由2017年起，共18次買入類似投資，全部屬一線藍籌。別以為間公司好透明，全因永義市值只有幾億，每次投資都逾半億，礙於上市條例，無辦法唔公佈而已。相比永義，力寶華潤（156）可算非常專一，3月首次公佈買入騰訊（700）股份，4月就做掛鈎投資，5月再玩埋另一個方向，出售備兌認購期權（即係sell call），為自己的騰訊收啲期權金，補下個傷口，6月再發盈警，話因為投資虧損。留意番佢個業績只係截至3月結，但騰訊跌得最甘，係由6月開始，所以最壞情況似乎還未出現。
九倉（004）去年分拆九龍倉置業（1997）上市後，冇派特別息但就用咗255億投資股票，按管理層話，自去年下半年起，已經用了100億買地產股，150億會買內地科技企業的股票。恒生地產分類指數今年跌了4%，算係跑贏恒指，唔算太傷，但內地科技企業可能表現得較差，由於大型內地科企唔多，騰訊係必然選擇，今年暫蝕10%。九倉今天公佈的業績，應該要更詳細交代，現時的市況，有懷疑，大多數都會用腳投票。
青冰
http://fb.com/chingbing888
本欄逢周四刊出