財女手筆：馬鋼博升50%

【蘋果日報】中美貿易戰打極未完，市場氣氛轉弱，今年以來熱炒嘅醫藥，教育同物管股齊齊調整。大陸喺貿易戰壓力下要保經濟，之前已經放風會再加大基建投資，咁嘅背景下，基建同資源股即時炒起。當中，馬鞍山鋼鐵（323）係其中一隻值得留意嘅股份。
係大陸供給側改革下，內地鋼鐵不斷去產能，整體庫存呈下降趨勢。加上不斷推出新環保標準，小型鋼鐵廠喺成本上升下難以同大廠競爭，龍頭鋼鐵企業將會受惠。今年以來內地鋼價硬淨，按年錄得一成升幅，對馬鋼嘅盈利提供重要支持。每年6至7月本來係鋼鐵行業淡季，不過今年竟然一反常態，鋼價錄得升幅之餘庫存竟然下跌，證明需求強勁。根據中國鋼鐵工業協會係7月尾發佈嘅調查，上半年內地鋼鐵企業實現利潤按年大升1.5倍，作為龍頭嘅馬鋼業績預計唔會差。
馬鋼首季業續已經非常好，盈利按年升5成。喺淡季不淡之下，今個月發佈嘅半年業績盈利要超越上年同期嘅16億人民幣基本無難度。鋼鐵行業傳統旺季下半年先到，預計2018年全年盈利將會創新高。
馬鋼現價市盈率得6.5倍，計及今年盈利增長大約5成，預測市盈率會跌到得番大約3倍，估值低殘。即使現價上升5成去到6元，預測市盈率都只係6倍左右。配合埋現價接近5厘股息率，馬鋼可以作為大市波動下，進可攻，退可守之選。
Melody
http://fb.com/whichroad