【馮仁昭四圍超】《惡循環》外景車出事　5死14傷　程東逃過一劫

【蘋果日報】由杭州銘盛影視文化有限公司出品嘅懸疑動作電影《惡循環》，上個月24號喺杭州開機，馮仁昭收到消息，呢部戲嘅演員除咗林震同李蓉兒之外，仲有《賭聖》入面飾演有特異功能嘅大軍一角、星爺御用反派程東。
不過，《惡循環》上周三喺杭州雙浦鎮靈山村大塢盆地拍外景嗰陣，發生嚴重車禍，據官方公佈資料，最少有14人受傷。有傳意外當日程東都喺現場拍戲，而且仲受咗傷㖭。
試車生意外
前日馮仁昭終於搵到程東，佢話出事套片佢係有份拍，不過佢冇事避過一劫。程東話：「出事嗰日場戲我冇份拍，嗰日係試車出事。發生咁大件事梗係要停工，總之祝套戲工作人員平安大福，身體健康。」
對於意外傷亡人數，程東唔肯點講，只係話電影公司透露話下周日復工，程東仲話復工係好事。另外，有劇組人員喺朋友圈爆料，話有三個武師、一個化妝師同一個場記共五人當場死亡，但有指劇組受到壓力要調低傷亡人數。
撰文：馮仁昭