【馮仁昭四圍超】酒店為朋友慶生　陳凱琳鬆身衫蒲頭

【蘋果日報】現年27歲嘅13年港姐冠軍陳凱琳（Grace）同48歲鄭嘉穎拍拖三年，近日爆出婚訊，有指佢哋將會喺本月12日於峇里結婚，更傳出佢哋係雙喜臨門。Grace日前喺Ig公佈咗喜訊，證實去年訂咗婚，佢形容未婚夫鄭嘉穎係「The One」，仲否認奉子成婚。但平時活躍Ig嘅待嫁新娘子Grace就一直潛水，到前日先至再度現身限時動態，仲到咗紅磡一間酒店幫朋友慶祝生日，四個女仔一齊gathering，仲大玩相機先食。
生日歌賀壽星
Grace除貼咗食啲乜嘢之外，其中一條限時動態就影住壽星女拎住蛋糕準備吹蠟燭，重點係片中有Grace開心拍手唱生日歌送畀壽星女聽嘅片段，紮起頭髮嘅Grace着住件極鬆身銀色恤衫，但只得半身，有冇大肚就真係睇唔到。而佢朋友嘅另一則限時動態就有一張Grace嘅全身相，雖然見到Grace下身配黑色短褲，但仍然睇唔到佢有冇肚凸凸。
撰文：馮仁昭