「釘王」第三代開日式食店　月收30萬 「老竇跌晒眼鏡」

【蘋果日報】【周末專題】近年越來越多富二代、三代唔願接手家族生意，反而拚命創業，為的是一份成就感、認同感。「一代釘王」、桂洪集團已故主席陳桂洪第三代凌俊仁，就因為一份滿足感，毅然投身「身水身汗」的飲食業，就算飽受濕疹影響，但仍無礙其決心，半年前就與3名好友創業，開日式創作卷物食店Chotto Maki。
記者：葉煜燊
桂洪集團近年都相當低調、甚少在鏡頭出現，知名度相當低，如今作為釘王後代、年僅28歲的凌俊仁首次現身，但並非介紹樓盤，而是分享其創業經過。沒有釘王當年的霸氣，反而是表情和身體語言都帶點靦腆，理工大學酒店系出身的凌俊仁，實習期間便接觸飲食業，當時因為享受客人帶來的滿足感，所以便決定創業開快餐店。不過就算有明確的目標及計劃，但其父親凌志堅卻不睇好，因為「佢（父親）睇唔到個前景。」
出售創作卷物
身為富三代明明資金雄厚，但卻選擇同人夾份投資約120萬元，自己就出約60萬元成為大股東，而且地舖選址還是在中環利源西街一個不顯眼的位置，面積僅容納20多人，月租約5萬元，原因好簡單，是因為他不喜歡做大型餐廳，而且想降低投資金額。
雖然是大股東，但每次有意見分歧時都並非一言堂，「實會有一、兩個意見唔同，實會有磨擦，我其中一個partner成日都話要轉啲咩轉啲咩，我覺得合理，但你知廚師有佢哋自己嘅意見，我就叫佢（partner）畀多啲時間，你想轉呢樣嘢，你講咗，廚師會聽，但你唔好expect（預期）廚師即刻轉。我就係中間人，我要令到佢哋所有人個關係唔可以有破裂，其中一個人有拗撬，就好影響成間餐廳嘅運作。」
患濕疹無礙創業
為了貫徹快餐理念，凌俊仁參考麥當勞的餐牌，「現在（餐廳）1至12號個item已經Set好咗，因為我想學到麥當勞個形式就係，人哋淨係根據嗰幾款卷物去落單。」
仔細一看餐牌，可見主打的卷物無論是大卷（4件）或細卷（8件）均一律售68元，價錢親民，皆因曾被人投訴，「有一枱客坐喺到，嚟過幾次，之後一加價，佢哋真係試過發脾氣，佢話你啲嘢越來越貴。」
他雖患有濕疹，無礙搞餐廳的決心，但未能下廚，「不過所有嘢我都熟悉，切壽司、切青瓜都識。」最後他選擇做與客人最多交流的收銀工作，其間有名客人令其印象最深刻，回憶該情景時，凌俊仁不時面露笑容，「有個西班牙的女仔嚟到，真係唔識講英文，我用咗成15分鐘嘅時間先說服咗佢買一條卷物，係要好有耐性。」
首次創業的凌俊仁坦言，「搵舖、搵師傅、搵裝修、統統都係好困難嘅事，其實最困難係搵師傅。」他指自己好好彩請到如今的大廚，因為大部份日本師傅都有原則，往往不會接受改變，「見咗10幾個師傅先真係請到我現在呢個大廚。」目前食店有3名全職及1名兼職幫手，每月人工支出約10萬元。
Chotto Maki於今年初開業，至今已近半年，凌俊仁表示，開業第2個月已經收支平衡，其後開始有錢賺，平均每月營業額達30萬元，這一成績已令「我老竇（凌志堅）都已經真係跌晒眼鏡」，本計劃擴張，但卻被天價舖租一個迎頭痛擊。他灰心地說：「因為舖租好貴，搵咗好耐舖都搵唔啱，決定放低一陣先。」他透露，原打算在尖沙嘴加連威老道一帶開分店，但舖租約需13萬元。