會師中環：富二代講勵志太虛偽

【蘋果日報】雖然富二代經常忙於打理家族生意，但可能佢哋對社會都有一份使命感，所以久不久就會出來勉勵時下年輕人。近期有「Full Pay買樓」嘅陳振邦，而遠啲就有「去少幾次日本」嘅劉鳴煒，以及「成功需苦幹」嘅蔡加讚。佢哋能唔能夠激勵年輕人我唔太清楚，但我相信佢哋就激嬲唔少香港人。
細心一諗，呢啲富二代想講嘅，其實不外乎「努力改變命運」、「自古成功在嘗試」、「事業有成靠拼搏肯捱」等老土到不得了嘅勵志說話，我相信大家由細到大從父母同老師口中都聽唔少，點解當時聽都唔覺有咩大問題，但富二代講就特別乞人憎？
富二代講勵志說話之所以咁難聽，係因為佢哋嘅存在根本就唔勵志。佢哋一方面同大家講努力啲就能達成目標，但另一方面，佢哋一出世只靠家族背景就已能夠做到大部份人辛苦一生都未能做到嘅事。佢哋嘅人生，活生生地證明了「好波不如好運」，所以由佢哋講勵志說話，係一種虛偽。再者，呢啲富二代通常都強調自己十分努力才能成功，完全無視佢哋與生俱來嘅財力、人脈等成功元素，結果就令到整件事更加虛偽同唔勵志。
富二代本身就令人妒忌，虛偽的富二代就更乞人憎。我諗佢哋下次都係唔好出嚟賣埋啲冒牌心靈雞湯，廢事搞到激勵變激嬲。
神仙丁
《審計搵丁》負責人
http://facebook.com/AuditSlave/
本欄逢周五刊出