當洗衣機係臨時「託兒」用品雷凱欣被鬧爆罔顧囝囝安全

【蘋果日報】34歲嘅「雷神」雷凱欣喺12年爆出戀上擁有近200架的士嘅車行太子爺陳智聰（Jack）後絕跡娛樂圈，雖然喺今年2月意外被鄭希怡（Yumiko）一家三口遊東京時，洩密雷凱欣升呢成為幸福人妻兼媽媽，不過雷凱欣一直未有承認，直到日前佢喺ig放閃，貼咗同阿仔嘅親子相，仲留言分享為人母心聲。
唔知係咪擺開有舖癮，前日雷凱欣又喺ig貼相，點知俾好多網民喪鬧！事緣佢post咗張擺咗阿仔喺揭蓋式嘅洗衣機裏面嘅相，之後就留言話：「今日喺日本嘅屋企發現開蓋式洗衣機嘅好處，當你化妝ing嘅時候，原來可以將呢個痴媽根嘅小朋友放落去企喺你隔籬，又唔怕跌親，而佢又可以望住你，一舉幾得。」
最初都有網民留言讚阿仔同媽咪好似樣等正面留言，雷凱欣仲覆：「痴媽根即係痴住阿媽條根！」點知轉個頭就俾啲媽咪級嘅網民喪鬧有人覺得佢影相為呃like，亦有人覺得佢唔理個仔嘅安全，質疑佢嘅做法，最怕個仔之後有樣學樣，自己爬入去，出咗事之後就後悔莫及！