【街訪】深圳陳小姐1900蚊買黃牛

【蘋果日報】黃子華「金盆(o浪)口」最後一騷，不少觀眾雖然是首次捧場，但都大嘆捨不得，更異口同聲說希望子華將來繼續做棟篤笑。
深圳陳小姐：
今次搵人幫我喺香港買，好貴，張飛1,900蚊，我特登喺深圳過嚟，真係好鍾意子華，好唔捨得佢，細細個已經睇佢電影同電視劇，成個騷覺得成人話題好搞笑。
鄧先生與太太：
買咗480蚊飛同太太睇，好多part都好好睇，尤其係一開頭嗰part已經好精采，因為輯錄咗子華咁多年嚟咁多輯棟篤笑嘅精華。太太以前都有嚟睇，反而自己就第一次，希望唔會係最後一次。
江門陳小姐與男友：
好唔捨得、好鍾意黃子華，每一part都鍾意，啲飛係880蚊原價飛，男友排隊買，一路有睇子華作品，希望今次唔係最後一次，以後都會支持佢。
李小姐與男友人：
好享受，覺得子華唔會係最後一場，我哋都係第一次睇，覺得好好睇。關於香港、同性戀同埋性工作者呢幾段好精采，鬧林鄭嘅時候最好睇。
外國返港黃小姐：
喺場內喊咗兩次，依家講講吓都想喊，希望唔係最後一次。最好睇係陳冠希嗰段，咁多年都冇人幫佢平反。
梁先生與雷小姐：
Part part都咁鍾意，冇話特別邊一part特別鍾意。我哋都係第一次睇，希望子華會再做，如果再開騷一定會支持。