【網民hot talk】除鞋冚被大覺瞓　露宿東鐵的奇聞

【蘋果日報】港人生活繁忙，瞓覺都唔係好夠時間，相信唔少人都試過喺港鐵車廂補眠，有時覺得冷氣勁可能會披件衫。不過，有網民上傳相片上Facebook群組「巴打絲打Facebook Club」，有人竟然誇張到帶埋被，喺東鐵車廂旁若無人大覺瞓。有網民寸佢哋「做咩唔紮埋營」，有人就表示同情：「劏房租唔起、四海為家」。
從網民上載嗰張相所見，估計有兩至三個小童，坐喺東鐵車廂座位，一張大被齊齊冚，仲將背囊、袋掛喺車窗嘅把手，兼且連鞋都除埋，其中一個女童仲瞓到頭都側埋，似乎都瞓到好稔咁，當正自己屋企一樣。不過，睇返旁邊嘅乘客，就好似若無其事咁，唔知係唔係東鐵一向多奇景，大家都見怪不怪。
翻查資料，港鐵嘅奇景真係多籮籮，有伯伯試過帶近2米高嘅植物都入到車廂，有人自備摺枱做功課，甚至開枱打牌，唔少水貨客更經常抬住大大件電器出沒，貨如輪轉。