【一周必看】大膽女fb放售熊貓狐　GOGOVAN到付

【蘋果日報】大家仲記唔記得舊年嗰隻小赤狐呢？佢已經喺3月移民咗去新加坡動物園，佢曾被當成狐球，差啲要人道毀滅，但有人似乎冇吸取到教訓，仲係隨便買賣同飼養動物。
讀者王小姐上星期四（19日）喺facebook群組「香港寵物交易區」，發現有人放咗幾張聲稱係「熊貓狐」嘅相片，相入面嘅狐狸仲係一隻BB，白雪雪、面尖尖咁，耳下位置有兩撮灰毛，貼文嘅其中一張相中嘅狐狸比較細隻，相信係剛出世時影，但就冇講係咪同一隻。王小姐話曾經有網民留言指賣家犯法，要求佢刪除，但賣家就好寸咁叫對方報警。之後王小姐假扮買家查詢，賣家話隻狐狸4個月大，係男仔嚟，開價$3,600，王希望有關方面跟進吓。
嘉道理農場嘅專家話其實呢隻係赤狐，係人工繁殖作皮毛貿易之用。由於狐狸身上可能帶有狂犬病，唔鼓勵市民將佢哋當寵物飼養。漁護署發言人話會跟進調查網上賣赤狐事件。