告別菜街

【蘋果日報】十八年來，一直是本港街頭表演樂園的西洋菜南街行人專區，將在今晚10時後曲終人散。歌聲舞影消逝在燈火闌珊處，歡樂昇平地還原為人車匆匆來去的街巷。一切喧鬧將回歸平靜，有人為街頭表演的興衰轉變不勝欷歔，依依不捨。也有人只是過客，早已轉身另覓舞台。這裏是旺角街頭，這是最後的一夜。
記者：李雨夢　李思潁　麥志榮
殺街前夕的下午4時，西洋菜南街行人專區開放，天仍未黑，各路人馬紛紛架起舞台，觀眾也早已擔好凳仔搶佔位置。一浪浪的歌聲響起，越夜越熱鬧，不同攤檔前聚攏了大群人。表演攤檔中還夾雜了塔羅、紋身彩繪、影相攤檔，一樣有數十人排隊。整條菜街約有30個檔口，近3,000多人在流連，好像表演會永遠繼續下去。但政府已宣佈菜街行人專區將於8月4日終止，今天便是行人專區最後一天。
臨別依依，在菜街演唱6年的Lisa直言感到不捨，「旺角係好就腳嘅地方，老人家冇咩節目都會落嚟聽吓歌，紓緩下心情，同埋呢度好有香港特色，表演帶旺埋呢一區嘅商舖」。Lisa指，現時仍未知將來會於何處繼續演唱，「暫時都冇諗，都有一班歌迷，之後都唔知點再唱畀佢哋聽，所以佢哋今晚點都要嚟」。在菜街另一角，有檔口的表演者唱着《萬水千山總是情》和《友誼之光》，彷彿為這條街送上離別之歌。
前年聖誕才開始在菜街唱歌的「旺角思思」直言沒太大傷感，「當初係朋友介紹先嚟唱歌，轉過幾個檔口，依家算係自立門戶」。她透露已有餐廳邀請她駐場演出，「如果到時觀眾想聽我繼續唱歌，可以去餐廳到聽，喺油麻地，好近」。
八両金撐場　籲支持街頭文化
藝人八両金帶同兒子前往歌手楊峰的檔口撐場，八両金嘆道，菜街是香港街頭文化代表，「呢到就好似平民夜總會咁，亦都代表香港嘅風雨，都幾似我一生嘅經歷」，希望政府支持街頭文化。楊峰指政府殺街決定太倉卒，「佢應該諗吓點樣安置街頭表演者，而唔係咁樣一刀切」。
自2014年雨傘運動後，鳩嗚團風雨不改在西洋菜南街擺檔，成員細儀表示，3年來見證旁邊檔口變化，「多咗好多檔唱歌，好多大媽，由街頭至街尾都喺，嘈到連人講咩都聽唔到」。她表示殺街後不會離開，會堅持留下表達不滿政府的訴求，只會把檔口「擺入少少」，以免阻街。
政府殺街是由於居民及商戶不滿。在菜街住了30年的劉太直言對殺街一點不覺可惜。她多年來投訴了多次，「嘈到我晚晚都瞓唔到」。她亦不懂得欣賞街頭表演，「有啲喺賣唱，啲人畀錢啲大媽，好似好唔乾淨咁」。但也有街坊稱已習慣了表演聲浪，關上窗後都可以接受。住了10年的姚小姐認為：「有表演係會熱鬧啲，但因為越嚟越多人，彼此有競爭先大聲咗」。
店員不滿阿叔成日唱《Beat It》
在2樓體育用品店工作的職員黎先生則贊成殺街：「有個阿叔成日唱Michael Jackson首《Beat It》，不斷beat it真喺有啲燥」。售賣電子零件的地舖負責人葉先生卻覺得表演聲浪可以接受，「最多都喺講嘢要大聲啲」。他認為這種街頭表演是香港特色文化，擔心少了遊客前來，令人流減少，影響生意。樓上書店職員劉小姐表示，關上窗依然覺得嘈吵，但為一班認真表演的藝人感到可惜，「真喺有啲表演者用十年功力，用心表演畀大家睇」。她批評政府沒有一個妥善的管理制度，導致到現時混亂局面。
香港人又愛又恨，外地人又有何觀感？第一次來到香港旅遊的江西遊客許小姐在看完表演後認為表演很「活躍」，感受「香港很繁華」。她認為如果聲浪過大擾人，香港政府應另外安排地點讓他們表演。
無論如何，晚上10時，行人專用區的開放時間結束，警方與食環署隨即要求表演者及途人回到行人路上，馬路恢復通車，就像是為了今晚正式「殺街」進行了一次預演。