十年捧場客失樂園

【蘋果日報】【旺角殺街】「傷心過後，要走的始終都要走……」旺角西洋菜南街行人專用區（下稱菜街）的歌聲喇叭聲，今晚迎來最後一夜。擾民噪音告一段落，有人歡喜；失去一大平民娛樂消遣地，有人不捨。長情歌迷捧場數年甚至十年，每個星期風雨不改準時菜街報到，臨別依依，有甚麼最為不捨？
記者：黃翠儀　葉靜儀
現年74歲半退休人士楊生是土瓜灣居民，年多前經朋友介紹得知菜街「有歌聽」，自此每逢周末大都到場欣賞，同時利用自己專業音響知識，為好友表演者季林（藝名）打點表演設備。他指每次花費約百多元，「每檔畀幾十蚊咁」，在此認識了一些朋友，大都是60多歲退休人士，笑言聽歌之餘，「條街咁旺，靚女都多啲啦」。他更嘗試為一些表演者抱不平，「標籤大陸落嚟唱歌嗰啲，年紀又有返咁上下，40歲以上嗰啲叫佢做大媽，其實本港都有4、50歲嚟呢度唱啦！」
轟政府斬腳趾避沙蟲
對於殺街，他不捨得，「因為以後無咗個地方，唔知去邊度」，日後和朋友較少機會見面。他形容到菜街是退休人士可參加的活動之一，「唔使用腦筋又唔使用體力，咁樣去聽吓歌幾enjoy吖」。今晚他將到菜街與朋友合照，「留念吖嘛，起碼都知道最後一日……將來有啲回憶囉，係嘛？」
專誠由新界到來捧場的菜街常客余先生，自言每逢周末假日都風雨不改現身，習慣已維持約10年，他形容「多數嚟呢度，大家叫做喺度有朋友嘅感覺」。面對殺街，他直言「都有種失落感」，指菜街是「好好消磨、幾好玩嘅地方」，提到因自己懂得彈琴，有時會到場「客串吓」。他批評政府「平時又唔管理，到有問題又唔諗辦法，一殺殺咗佢（菜街）就算數」，形容政府只是斬腳趾避沙蟲。
在菜街某護膚品店兼職的鍾小姐慨嘆，殺街以後會「失去一啲應有嘅特色」，但她笑言「唱得唔係幾好聽嘅，我唔會唔捨得嘅；或者係唱得比較難聽嘅時候呢，就覺得好嘈」。對於有區議員早前試行模擬規管行人專用區，鍾小姐認為「如果分貝管制到就好，但仲有一啲枱底交易都要睇埋」。她說今日或會在戲院門口附近留影，記低最後一日。
住大埔的陳先生亦是菜街常客，閒時會在固定攤檔表演跳舞，「玩咗8、9年」。作為退休人士，他指生活百無聊賴，但在旺角可欣賞別人演出，又可跳舞自娛一番，時間會過得快些，坦言「吹吓水、表吓演，然之後去酒樓，咁又一日啦」，並指在菜街消遣「經濟啲」。
盼尖東成新表演地
對於現有表演者，陳先生「希望政府搵撻適合嘅地方，畀所有嘅朋友或者fans，大家喺一個聚會裏面」。他又促請政府考慮發牌，以規管表演者噪音問題，現在噪音問題嚴重，「所謂多咗『大媽檔』，開啲音量就大聲啲，而且每一檔距離又相當之近，大家一齊output，影響商舖同行人」。至於表演者未來的去向，他認為揀選尖東海旁較西九好，因為尖東的天星碼頭有交通直達，至於西九文化中心，他坦言「行到去都差唔多半粒鐘，搭車又要行，好唔方便」。
菜街側影