會師中環：假共享自然做唔長

【蘋果日報】早前gobee.bike敗走，標示着「偽共享經濟」的道路並不易行。我之所以話佢哋係假共享，係因為佢哋欠缺共享經濟的兩大元素：分散的產權和本身閒置的資源。
以Airbnb及Uber為例，房屋及車輛的擁有權分散於不同個體，伴隨而來嘅責任，如維修房屋及看管車輛，亦不會集中於Airbnb或Uber身上，而係由財產擁有人負責，使該等公司能夠避免沉重嘅開支付擔。相反，gobee.bike的單車全部由該公司擁有，令公司需要付出高昂保養及看管費用。正因如此，gobee.bike未能享受共享經濟分散責任的好處，將所有單車攬晒上身，結果就是入不敷支，倒閉收場。
另外，Airbnb同Uber嘅屋同車，本身有其他正式用途，閒時出租共享只是副業，令閒置資源獲得充分利用，而閒置本身不帶來額外成本。相反，gobee.bike嘅單車係特登買返嚟擺到通街都係，所謂閒置根本代表蝕錢。當一盤生意有大量資源閒置，自然會蝕大本做唔長。
從經濟學角度來睇，共享經濟本身就係利用科技平台減低配對成本，令資源能夠更有效同容易分配，從而促進社會發展。但觀乎「偽共享經濟」的生意模式，卻係憑空創造出一堆經常閒置等人用嘅資源，似乎與真正方向背道而馳。
神仙丁
《審計搵丁》負責人
http://facebook.com/AuditSlave/
本欄逢周五刊出