【姐匙talk】暗黑奀星未紅先驕勁冇品

【蘋果日報】娛樂圈嘅生存之道，除咗肯做肯捱，做人做事都要有品，係品格個品。點解咁講，事關我姐匙就親眼見識一位，自以為係當紅小生，但其實戲屎過二打六嘅「暗黑奀星」，一啲品都冇。
呢位人兄有次喺大型活動上，有班傳媒訪問佢，佢梗係眉飛色舞啦，之後有位小記想訪問佢，佢竟然大支嘢咁問人哋係邊間報館，最過份係問完人，知人哋做緊間奀茄公司，佢就扮晒嘢話自己依家有權選擇同邊間做訪問喎。
講完呢句，呢個「暗黑奀星」竟然轉身行開，身邊嘅人包括佢經理人都呆咗一呆。好明顯「暗黑奀星」覺得自己上咗位，以為係一線巨星，大間嘅就做，細間到講唔出名就唔做，呢啲咁冇品嘅行為，係做呢行大忌，你估你好紅咩，仲要未紅先驕。
偷食穿煲毀形象
而佢份人都幾口沒遮攔，又口花花，之前同好拍檔識咗咁多年，大家以為佢兩個熟到不可分割，隨時變情侶，好彩嗰位好拍檔醒目，挑通眼眉睇清「暗黑奀星」嘅真實一面，所以冇落搭。
可惜之後有位「儍女」上咗檔，信佢對愛情專一，但呢位「暗黑奀星」當儍女係水泡，以為戀情浮面，人人以為佢係好男友，贏人氣同形象。不過呢啲人本性難移鍾意偷食，最終穿煲，儍女亦都終於清醒。而「暗黑奀星」想建立嘅好男友形象，一下子被打沉，所以話天知地知，唔好以為冇人知！
撰文：Jessie
本欄逢周五刊出
姐匙talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。