【電影大師班】把聲嬌滴滴有得救　森美：講咸濕嘢一流

【蘋果日報】【電影大師班】製作一條短片，除咗講求內容和畫面，旁白和聲演都相當重要。早前《蘋果動新聞》請嚟靠把聲搵食嘅星級主持森美大哥作分享，佢除咗會開咪做電台節目，仲接好多電影或廣告配音工作，究竟一個人點樣配到咁多種聲音呢？
有唔少同事都提出疑問，認為自己把聲過於沉悶，森美就教大家一招「錯配」。森美話自己平時講嘢把聲，同做節目把聲唔同，因為佢嘅拍檔小儀聲音高，所以森美都要配合提高聲線，否則森美原聲太沉會令人感到沉悶。
佢又以電台前輩蘭茜為例，「蘭茜把聲係師奶聲，但係師奶聲唔講師奶嘢先夠潮。」森美認為旁白要配得生動有趣，重點係聲音同內容有錯配，先會產生個人特色，「好似有啲人把聲嬌滴滴，唔使驚，如果用嬌滴滴嘅聲講咸濕嘢，啲男仔聽到就一流喇！」
森美又分享錄廣告經驗，「配減價廣告，內容話七折，我能夠講到六折出嚟，客戶咪覺得好嘢喎！」佢話有時客戶都未必表達到自己想要乜，「有次個客話想要講得Sexy啲，我就配男人版Sexy，個客話唔係，咁我再配一個女性化啲嘅Sexy，個客話係呢啲喇，咁我就知佢唔係要Sexy，係要乸型扮Sexy。」對於Sexy一詞各人就有唔同理解，所以配音者自己首先要非常清晰，點樣演繹唔同嘅形容詞。
可能你會問，「唔係人人識做戲喎！」森美就舉咗個例，「外星人點扮呀？」佢即場扮咗一次，大家都認為好似，「呢把外星人聲喺邊度嚟？咪睇電視聽返嚟！」所以森美話如果發覺自己把聲悶，就要做更悶嘅事，就係資料搜集同練習，「只要多觀察身邊人點講嘢，再模仿練習，收集多啲聲音入自己寶庫，咁創造力就自然越多。」
森美即場都睇咗幾條有配音嘅動新聞，有為動畫或動物配音，有角色扮演等，究竟森美有咩評語呢？同場，森美仲教大家點樣做到氣聚丹田，即刻去片！