財女手筆：內地醫藥股候低吸納

【蘋果日報】中國大陸又爆出黑心事件，繼之前毒奶粉後，最近爆出黑心疫苗。長生生物被揭發疫苗造假，市場即時對內地醫藥股信心盡失，股價散晒，貴為龍頭既藍籌石藥集團（1093）亦不能幸免，曾經20元都穿埋，一時間，內地醫藥股由天堂跌番落凡間，大家爭住沽。
現時內地醫藥行業風頭火勢，短線當然繼續無運行。不過長遠少少嚟睇，呢個行業其實仍然值得留意。爆出黑心疫苗後，大陸當局已經嚴正聲明會嚴查同加強監管，呢個其實係會利好龍頭藥企。小型藥企係今次事件之後會更難同龍頭企業爭奪市場份額，強者越強之勢會越嚟越明顯。
其次，龍頭藥企基本面仍然強勁。創新研發投入加大，令未來盈利有保障。以石藥為例，喺2017年研究中嘅新藥就有約200種。龍頭藥企喺今年首季業績亮麗，普遍增長接近4成，而高速增長係未來幾年好有機會繼續維持。今次黑心疫苗事件，龍頭藥企受拖累而急挫，其實反而提供低價買入優質藥企嘅機會，而藍籌石藥同中國生物製藥（1177）會係當中值得留意嘅龍頭企業。
Melody