獎雪糕氹食菜不是好方法

【蘋果日報】家長各出奇謀氹子女食蔬果，有時難免會用獎勵方式。養和醫院高級營養師陳勁芝直指，「唔少家長會同小朋友講，你食呢碗菜就獎你食雪糕」，是以不健康的食物去做獎勵。有研究發現家長越用這些方法，小朋友反而越喜歡食不健康食物，根本無真正培養他們健康的飲食習慣，建議家長不要把食蔬果與獎勵掛鈎，應以身作則，平日多以蔬菜入饌。
陳勁芝表示，若家長為了一碗菜而對孩子又打又鬧，這會構成負面印象，令小朋友更加恐懼食菜。她認為，家長自己本身都食蔬果不足，大部份成年人每日進食量只有建議的一半或更少，因此應該將蔬果入饌，「建議每一餐都要有菜，煎豬扒炒肉片都加啲菜入去，令小朋友唔覺唔覺都食到」。
部份家長又以為食多些生果是可以取代蔬菜，但陳勁芝強調生果不能取代蔬菜，因只食生果有可能會攝取過量糖份，因此必須要獨立計算。她稱將食融入生活中，與小朋友一同計劃及選購蔬果，讓他們認識蔬果，有助培養孩子健康飲食習慣。
■特約記者簡淑敏