同胡兵粉絲隔岸開火關淑怡未嬲完宣佈退出微博

【蘋果日報】關淑怡（Shirley）日前忽然喺微博，貼文批評大陸藝人胡兵於上個月喺Ig一個貼文，隨即再同網民開拖互駡，而全件事嘅起源，就係兩隻來自兩間酒店嘅拖鞋！
同網民「駁火」鬧足一日，Shirley前晚10點幾，再喺微博貼長文，話會退出微博，以後不再見面，但火氣似乎仲未消嘅佢，同時又怒斥力撐胡兵嘅網民，叫大家自我反省。
Shirley留言話：「我退出微博！以後不再見面！謝謝胡兵的拖鞋！誰怕誰？痴叉xxx線。胡兵會老去喫！醒少少啦。好心冇好報！我就把，這一切給記得說明護兵他本人、他的團隊打手和他的老殘粉絲不敢看我把所有capture的文章及在外國人長大的中國人眼中心知係流着中國人血統在外國長大的人他們都覺得胡兵實在丟臉得太緊要啊，我只是跟其中一名不知名物體見中國人就鬧人家『土包子』，我想他應該是『暴發戶』，我看不過眼才溫和地叫他不要在胡兵的悵戶亂駡一通。知否那位老外說四季就是四季？胡兵識唔識聽㗎！老外係串緊佢啊！因為外國人不怕你們內地人OK中國人滿意了吧！不要再自取其辱啦！世事無絕對，他朝中國有問題嘅時候沒有外國人會肯幫中國人的不要太自以為是，凡事不要太絕不要太自誇。你（胡兵）正是國際名模，大將風凡在哪裏？反省一下吧。腦殘粉更需要自我反省！己所不欲勿施人！還有，你敬我一呎我敬你一丈，否則，冇面俾，！clear?」
雖然，Shirley前晚同時喺Ig貼文，話決定終止微博帳戶，仲話請有關人士幫佢處理，如果之後有任何戶用佢義開嘅帳戶都係盜用。不過，唔知Shirley係唔捨得個微博帳戶，定係心思思想知道網民有乜反應，事關昨早10點幾佢又現身微博「巡場」，仲再次同網民駁火，期間佢仲激動得用「八婆」去形容網民，有Shirley歌迷仲撲出嚟幫佢護航，同網民互鬧，有較冷靜嘅歌迷就叫佢唔好再嬲。