新聞類別
港聞
詳情#
【蘋果日報】人生如戲。
人生路途上，惠英紅曾經是灣仔紅燈區街童、夜總會舞女，當你以為她的人生就此「低位徘徊」，她卻忽然鯉魚翻身，以22歲之齡成為首屆金像獎影后；成名後，她一度患上抑鬱自殺，年事漸長加上事業轉型，本以為要退居二線，惠英紅卻成為金馬影后，今年更獲特區政府授勳銅紫荊星章。她在人生舞台的表現，大概用上黃興桂金句「神奇、頂級、超卓」才足以形容。
走過高山低谷，名利在手的惠英紅看着至親父母及四哥惠天賜先後離世，仍然單身的她看化了：「做人唔好太貪心，貪心就好多遺憾，諗到好多遺憾，就搞到自己真係好多遺憾。」
惠英紅決心繼續為娛樂圈及社會出力，只因58歲的她，心中一團火仍然熾熱。
紅燈區的街頭智慧
現今父母都為子女鋪出黃金大道，希望他們贏在起跑線，然而惠英紅根本連讀書的機會都沒有。她和八兄弟姊妹生於一個窮困家庭，兄姊童年被送京劇學校寄宿，她與妹妹及父母則窩居於調景嶺木屋。1962年颱風溫黛襲港，惠英紅這個小小的安樂窩也保不住，「瞓到半夜突然傾盆大雨，點解望到天空，溫黛將我哋間屋吹走，我當晚同老竇、阿媽、妹妹漏夜執嘢走，輾轉去咗銅鑼灣百德新街舊樓瞓樓梯底」。除了瞓街，三餐亦要向酒樓討餸頭餸尾，「當年酒樓人情味濃，前台做生意，食剩飯菜留畀窮人拎走，我哋食菜頭菜尾食咗大半年」。
有危就有機，在困境之中惠英紅抓住了機會。「嗰時開始變醒，有一日有位好心阿姨行過，見我哋好淒涼，建議阿媽帶我同阿妹跟佢去灣仔乞錢」。如是者惠英紅兩姊妹每天中午便流連灣仔紅燈區，「阿姨教我哋賣白箭、綠箭、黃箭香口膠，每排成本幾毫子，卻賣到一蚊，當時幾暴利。我哋又賣筷子、裸女啤牌呃啲水兵。水兵打完仗就嚟，一年開工8、9個月，有船（到港）先出去」。
環境艱難，加速了小英紅的成長，為了生活，她不得不學懂觀人於微，「我好快學識睇人眉頭眼額，專揀和順樣水兵先埋去，試過幾次搵錯target（目標），俾人推跌落地，俾人打多幾次就識揀，粗眉凸眼具煞氣就唔揀，揀安全先過去」。
兄姊跟師傅學戲，遭師傅刻薄，此時惠英紅的「街頭智慧」也能派上用場。「師傅成日嚟我屋企『頴錢』，唔畀佢就威脅返去打我哥哥姐姐，佢又講嘢侮辱我父母，有時仲話要摷我哋個袋攞錢」。惠英紅不甘父母受辱，於是乘師傅再來整蠱他：「我企門口大聲叫妹妹斟茶畀師傅，我專登話噚日喺灣仔問個姐姐拎咗啲毒藥，擺落佢杯茶毒死佢，等佢以後唔好嚟，師傅聽到就對我父母話：『你個女短命種，咁毒，一定死於非命。』師傅自此唔敢再嚟，阿媽誤信以為我係壞細路，其實我出招箒」。
經過十年街童生涯，惠英紅成為眾人大家姐，但同時令她錯失入學機會，她感慨地說：「我賣嘢叻，賣夠4小時，數夠百幾蚊就『吞卜』，走去公園打韆鞦買嘢食。最後我超齡，至今冇讀過書，反而妹妹有書讀，所以，我認為最靚嘅時裝就係校服。」由3歲小孩變成13歲少女後，惠英紅自覺羞恥，不再流連街頭。
兄長猝逝長瞞母親
惠英紅家世本來不差，父親是滿洲正黃旗人，生於富貴之家，為避戰亂隨家僕來港，可惜不擅理財和嗜賭，因而輸掉身家，落難到工廠做啤工工人。因為一次工業意外，惠父被射爆右眼，加上左眼遺傳弱視，遂失業在家。惠英紅憶起有一次被母親發現偷懶體罰，父親衝前作狀假打救駕，不料父女「奸計」被拆穿：「媽咪嬲到攞膠水喉真打我，膠水喉一拖，真係會皮開肉裂，爸爸肉痛，用身為我擋。」
最終父親在惠英紅19歲時患癌病逝，「爸爸臨死前迴光反照，好似冇事咁，我記得佢同我講：『你放膽做，想做乜嘢都去做，你做任何嘢都啱』，呢句好緊要」。這句說話，亦成為了惠英紅人生的座右銘。講到父親，惠英紅特別感慨：「生離死別，每個人一定有，對我嚟講唔會好大（傷感），最傷感係我哋生活環境好少少，佢享唔到福，喺街邊賣嘢時佢好健康，我拍戲做主角，《長輩》拎影后，我將獎座放喺神枱，祖先個位。」
父親過身後，惠母患上認知障礙症，身體每下愈況，並於前年離世。惠英紅憶述母親彌留一刻：「唯一得我攬住佢，同佢念經。佢係好傳統嘅媽咪，我比身邊個個都叻，但佢覺得講出嚟唔好，到斷氣前都未讚過我一句。」愛，很多時說不出口。惠英紅曾因叫賣被拘留警署3日，惠母不顧一切闖入警署救女。「佢係山東婆，同人嘈嘈吓就打交，仲搶人支槍，俾警察㩒住。我判咗入住保良局3個月，媽咪轉而日日大鬧保良局」。法律不外乎人情，最終法官放生紅姐回家跟母親團聚。
惠英紅的另一個遺憾，是四哥天賜猝逝。由於年齡差距大，惠英紅跟兄姊童年感情不算深厚，惟她跟同是打星的天賜比較投緣，可惜天賜因星運平平淡出幕前轉營酒吧，但看到妹妹事業再展翅，2012年他因為心急減肥復出而出事。「佢最肥190幾磅，一個月減40幾磅，我提佢咁減有危機，唔可以求其食兩條芹菜、一隻香蕉、一個蘋果，跟住又去做幾個鐘頭運動，我話一定要睇營養師。兩個月就出事，身體耗盡，所有器官突然受損，坐喺度瞓着就走咗，走得安詳係最大福氣」。亡兄離世5年多，惠英紅重提傷心事，平靜中仍見漣漪：「我完全接受人係會走嘅，人走我唔覺得有問題，大家平等，佢嘅理由，我好唔舒服，我喺北京就唔舒服。」惠天賜的死訊，紅姐一直沒告訴母親，直至母親離世，仍不知白頭人送黑頭人。
武打女星全裸寫真
縱橫影壇41年的惠英紅，小小年紀已立志做明星，一切由灣仔東城戲院一個首映禮開始。惠英紅回憶說：「我見到主角好靚，心諗呢個就係有錢人，當時定下目標，一定要做到佢咁，係我理想。」於是她14歲到夜總會做舞女，剛好電影公司到後台揀蟀，她跟兩位師姐被選中，為張徹執導的電影《射雕英雄傳》試鏡。「佢哋打嚟後台通知，兩個師姐OK咗，我要試多次，我個心跌咗落地，第二次試鏡時，我有劇本，試黃蓉戲，我唔知邊個係黃蓉，副導演教我，叫我俏皮啲，嗰日傅聲嚟扮郭靖」。
兩日後，惠英紅被挑中演第二女主角穆念慈，可是母親不贊成：「我開心到不得了，媽咪問幾多錢，片酬得500幾，我跳舞月薪有2,000幾，媽咪鬧翻，唔肯同我簽約。」她即搵二家姐代簽，還向電影公司訛稱父母雙亡。後來惠英紅向母親承諾：「我話會賺5萬蚊畀佢，我話一定會紅，會搵好多錢。」
張徹是惠英紅第一個伯樂，另一個改變她命運的人則是李翰祥。李翰祥找她參演《乾隆下揚州》系列電影，還教曉她揣摩角色：「佢話一定要賦予角色一個生命，拍戲前就要將呢個角色擺入嚟，然後將自己掟走。」
1981年，劉家良開拍《長輩》，點名惠英紅首次擔正，開工十多天，她不幸患上盲腸炎，後來演變為腹膜炎，片場暈倒急送院，手術做了四個多小時。醫生叮囑她留院休養，但惠英紅未拆線便復工，因為她擔心被換角：「第一次做主角，係我轉捩點，我如果攤床十日八日，劇組會換角，手術後五、六日，我攣住出院開工，個身都挺唔直。」幸劉家良體恤先跳拍文戲，結果《長輩》為惠英紅摘下首屆金像獎影后，她再一次因為努力及「打不死」精神而抓住機會。
惠英紅是至今金像獎唯一「打女影后」，俠女形象深入民心，其實鏡頭背後，她也有女性化的一面。1988年，27歲的惠英紅為了證明自己，決定替《PLAYBOY》拍攝全裸寫真，有指是她自掏10萬元赴法國巴黎取景，每本賣100元，銷量高達15萬本。「我不忿，從來唔覺自己醜樣，但搵親我嘅角色唔係靚，識我嘅人知我好細心、唔粗魯，偏偏我用呢樣嘢（拍動作片）搵食。好想話畀大家知，我係女人嚟㗎，以往出埠，永遠我篋大大個，冇人同我拎落嚟，有啲女仔拎住細篋，都成班人湧埋去幫手。我真係比你靚，又細粒過你，點解冇人理我，大家叫我兄弟，我好似唔介意，但其實我係介意嘅」。
高峯滑落捱過抑鬱
上世紀80年代是惠英紅第一個高峯。90年代文藝愛情片興起，惠英紅欲轉型：「我求老闆畀我轉，佢唔肯，叫我一直做俠女，我自己開始厭，每日都受傷，每日都拍打戲，我開始覺得自己係女武師。我由年頭拍幾套，到年尾冇人搵，幾驚㗎，動作片女星片酬唔會比文藝女星高。」惠英紅約滿邵氏後遂離開。惠英紅的新開始並不順利，由高峯滑落的她漸漸患上抑鬱，連家人都不想見：「最差試過幾個月唔離開自己間房，我同家人住村屋，大家讓我住頂層，我唔落去，佢哋同工人都唔會上嚟，佢哋唔知我出埠定喺屋企，而我聽到二樓有聲就唔落去，等冇人就衝落去拎一樽水、拎嘢食。
「最差時將廁所塊鏡封晒，一望鏡就覺得自己醜樣、阻住地球、吸人啲空氣，乜衰嘢都喺個腦度。嗰幾年一塌糊塗，間房臭㗎，我連起身望廁所，急到不得了都冇動力去廁所，刷牙洗臉都冇，只攤喺張床，攤吓又瞓，越瞓越攰。」如是者她過了三年，根據資料顯示，她抑鬱症期間，曾服藥自殺，幸好閨蜜鍾慧冰拉她走出鬼門關。
積極治癒抑鬱症後，惠英紅再戰幕前，有過閱歷，演技更有發揮，她憑《心魔》及《幸運是我》兩奪金像獎影后，又因《血觀音》成為金馬影后，事業再上高峯，只是愛情方面卻一直交白卷。這算是人生遺憾嗎？惠英紅另有一番見解：「人生太多遺憾，當你唔諗，人生就冇遺憾，唔好再去太貪心，再硬要去講冇結婚係遺憾，咁你一定遺憾。做人唔好太貪心，貪心就好多遺憾，諗到好多遺憾，就搞到自己真係好多遺憾，咁就唔開心，何必呢？」
今年7月1日，特區政府公佈授勳名單，惠英紅獲頒銅紫荊星章，她表示感恩：「接到呢個消息時，我喺北京開工，感激唔同界別人士認同我喺電影圈小成就，好大鼓舞。」她還寄語後輩：「我唔係大成就，只不過唔係一個失敗者，遇到任何困難，千祈唔好放棄，淡定就可以解決到。」
記者：比華利
場地：金公館
攝影：林德雄
髮型：James Lee＠HAiR
化妝：littlewhite
人生路途上，惠英紅曾經是灣仔紅燈區街童、夜總會舞女，當你以為她的人生就此「低位徘徊」，她卻忽然鯉魚翻身，以22歲之齡成為首屆金像獎影后；成名後，她一度患上抑鬱自殺，年事漸長加上事業轉型，本以為要退居二線，惠英紅卻成為金馬影后，今年更獲特區政府授勳銅紫荊星章。她在人生舞台的表現，大概用上黃興桂金句「神奇、頂級、超卓」才足以形容。
走過高山低谷，名利在手的惠英紅看着至親父母及四哥惠天賜先後離世，仍然單身的她看化了：「做人唔好太貪心，貪心就好多遺憾，諗到好多遺憾，就搞到自己真係好多遺憾。」
惠英紅決心繼續為娛樂圈及社會出力，只因58歲的她，心中一團火仍然熾熱。
紅燈區的街頭智慧
現今父母都為子女鋪出黃金大道，希望他們贏在起跑線，然而惠英紅根本連讀書的機會都沒有。她和八兄弟姊妹生於一個窮困家庭，兄姊童年被送京劇學校寄宿，她與妹妹及父母則窩居於調景嶺木屋。1962年颱風溫黛襲港，惠英紅這個小小的安樂窩也保不住，「瞓到半夜突然傾盆大雨，點解望到天空，溫黛將我哋間屋吹走，我當晚同老竇、阿媽、妹妹漏夜執嘢走，輾轉去咗銅鑼灣百德新街舊樓瞓樓梯底」。除了瞓街，三餐亦要向酒樓討餸頭餸尾，「當年酒樓人情味濃，前台做生意，食剩飯菜留畀窮人拎走，我哋食菜頭菜尾食咗大半年」。
有危就有機，在困境之中惠英紅抓住了機會。「嗰時開始變醒，有一日有位好心阿姨行過，見我哋好淒涼，建議阿媽帶我同阿妹跟佢去灣仔乞錢」。如是者惠英紅兩姊妹每天中午便流連灣仔紅燈區，「阿姨教我哋賣白箭、綠箭、黃箭香口膠，每排成本幾毫子，卻賣到一蚊，當時幾暴利。我哋又賣筷子、裸女啤牌呃啲水兵。水兵打完仗就嚟，一年開工8、9個月，有船（到港）先出去」。
環境艱難，加速了小英紅的成長，為了生活，她不得不學懂觀人於微，「我好快學識睇人眉頭眼額，專揀和順樣水兵先埋去，試過幾次搵錯target（目標），俾人推跌落地，俾人打多幾次就識揀，粗眉凸眼具煞氣就唔揀，揀安全先過去」。
兄姊跟師傅學戲，遭師傅刻薄，此時惠英紅的「街頭智慧」也能派上用場。「師傅成日嚟我屋企『頴錢』，唔畀佢就威脅返去打我哥哥姐姐，佢又講嘢侮辱我父母，有時仲話要摷我哋個袋攞錢」。惠英紅不甘父母受辱，於是乘師傅再來整蠱他：「我企門口大聲叫妹妹斟茶畀師傅，我專登話噚日喺灣仔問個姐姐拎咗啲毒藥，擺落佢杯茶毒死佢，等佢以後唔好嚟，師傅聽到就對我父母話：『你個女短命種，咁毒，一定死於非命。』師傅自此唔敢再嚟，阿媽誤信以為我係壞細路，其實我出招箒」。
經過十年街童生涯，惠英紅成為眾人大家姐，但同時令她錯失入學機會，她感慨地說：「我賣嘢叻，賣夠4小時，數夠百幾蚊就『吞卜』，走去公園打韆鞦買嘢食。最後我超齡，至今冇讀過書，反而妹妹有書讀，所以，我認為最靚嘅時裝就係校服。」由3歲小孩變成13歲少女後，惠英紅自覺羞恥，不再流連街頭。
兄長猝逝長瞞母親
惠英紅家世本來不差，父親是滿洲正黃旗人，生於富貴之家，為避戰亂隨家僕來港，可惜不擅理財和嗜賭，因而輸掉身家，落難到工廠做啤工工人。因為一次工業意外，惠父被射爆右眼，加上左眼遺傳弱視，遂失業在家。惠英紅憶起有一次被母親發現偷懶體罰，父親衝前作狀假打救駕，不料父女「奸計」被拆穿：「媽咪嬲到攞膠水喉真打我，膠水喉一拖，真係會皮開肉裂，爸爸肉痛，用身為我擋。」
最終父親在惠英紅19歲時患癌病逝，「爸爸臨死前迴光反照，好似冇事咁，我記得佢同我講：『你放膽做，想做乜嘢都去做，你做任何嘢都啱』，呢句好緊要」。這句說話，亦成為了惠英紅人生的座右銘。講到父親，惠英紅特別感慨：「生離死別，每個人一定有，對我嚟講唔會好大（傷感），最傷感係我哋生活環境好少少，佢享唔到福，喺街邊賣嘢時佢好健康，我拍戲做主角，《長輩》拎影后，我將獎座放喺神枱，祖先個位。」
父親過身後，惠母患上認知障礙症，身體每下愈況，並於前年離世。惠英紅憶述母親彌留一刻：「唯一得我攬住佢，同佢念經。佢係好傳統嘅媽咪，我比身邊個個都叻，但佢覺得講出嚟唔好，到斷氣前都未讚過我一句。」愛，很多時說不出口。惠英紅曾因叫賣被拘留警署3日，惠母不顧一切闖入警署救女。「佢係山東婆，同人嘈嘈吓就打交，仲搶人支槍，俾警察㩒住。我判咗入住保良局3個月，媽咪轉而日日大鬧保良局」。法律不外乎人情，最終法官放生紅姐回家跟母親團聚。
惠英紅的另一個遺憾，是四哥天賜猝逝。由於年齡差距大，惠英紅跟兄姊童年感情不算深厚，惟她跟同是打星的天賜比較投緣，可惜天賜因星運平平淡出幕前轉營酒吧，但看到妹妹事業再展翅，2012年他因為心急減肥復出而出事。「佢最肥190幾磅，一個月減40幾磅，我提佢咁減有危機，唔可以求其食兩條芹菜、一隻香蕉、一個蘋果，跟住又去做幾個鐘頭運動，我話一定要睇營養師。兩個月就出事，身體耗盡，所有器官突然受損，坐喺度瞓着就走咗，走得安詳係最大福氣」。亡兄離世5年多，惠英紅重提傷心事，平靜中仍見漣漪：「我完全接受人係會走嘅，人走我唔覺得有問題，大家平等，佢嘅理由，我好唔舒服，我喺北京就唔舒服。」惠天賜的死訊，紅姐一直沒告訴母親，直至母親離世，仍不知白頭人送黑頭人。
武打女星全裸寫真
縱橫影壇41年的惠英紅，小小年紀已立志做明星，一切由灣仔東城戲院一個首映禮開始。惠英紅回憶說：「我見到主角好靚，心諗呢個就係有錢人，當時定下目標，一定要做到佢咁，係我理想。」於是她14歲到夜總會做舞女，剛好電影公司到後台揀蟀，她跟兩位師姐被選中，為張徹執導的電影《射雕英雄傳》試鏡。「佢哋打嚟後台通知，兩個師姐OK咗，我要試多次，我個心跌咗落地，第二次試鏡時，我有劇本，試黃蓉戲，我唔知邊個係黃蓉，副導演教我，叫我俏皮啲，嗰日傅聲嚟扮郭靖」。
兩日後，惠英紅被挑中演第二女主角穆念慈，可是母親不贊成：「我開心到不得了，媽咪問幾多錢，片酬得500幾，我跳舞月薪有2,000幾，媽咪鬧翻，唔肯同我簽約。」她即搵二家姐代簽，還向電影公司訛稱父母雙亡。後來惠英紅向母親承諾：「我話會賺5萬蚊畀佢，我話一定會紅，會搵好多錢。」
張徹是惠英紅第一個伯樂，另一個改變她命運的人則是李翰祥。李翰祥找她參演《乾隆下揚州》系列電影，還教曉她揣摩角色：「佢話一定要賦予角色一個生命，拍戲前就要將呢個角色擺入嚟，然後將自己掟走。」
1981年，劉家良開拍《長輩》，點名惠英紅首次擔正，開工十多天，她不幸患上盲腸炎，後來演變為腹膜炎，片場暈倒急送院，手術做了四個多小時。醫生叮囑她留院休養，但惠英紅未拆線便復工，因為她擔心被換角：「第一次做主角，係我轉捩點，我如果攤床十日八日，劇組會換角，手術後五、六日，我攣住出院開工，個身都挺唔直。」幸劉家良體恤先跳拍文戲，結果《長輩》為惠英紅摘下首屆金像獎影后，她再一次因為努力及「打不死」精神而抓住機會。
惠英紅是至今金像獎唯一「打女影后」，俠女形象深入民心，其實鏡頭背後，她也有女性化的一面。1988年，27歲的惠英紅為了證明自己，決定替《PLAYBOY》拍攝全裸寫真，有指是她自掏10萬元赴法國巴黎取景，每本賣100元，銷量高達15萬本。「我不忿，從來唔覺自己醜樣，但搵親我嘅角色唔係靚，識我嘅人知我好細心、唔粗魯，偏偏我用呢樣嘢（拍動作片）搵食。好想話畀大家知，我係女人嚟㗎，以往出埠，永遠我篋大大個，冇人同我拎落嚟，有啲女仔拎住細篋，都成班人湧埋去幫手。我真係比你靚，又細粒過你，點解冇人理我，大家叫我兄弟，我好似唔介意，但其實我係介意嘅」。
高峯滑落捱過抑鬱
上世紀80年代是惠英紅第一個高峯。90年代文藝愛情片興起，惠英紅欲轉型：「我求老闆畀我轉，佢唔肯，叫我一直做俠女，我自己開始厭，每日都受傷，每日都拍打戲，我開始覺得自己係女武師。我由年頭拍幾套，到年尾冇人搵，幾驚㗎，動作片女星片酬唔會比文藝女星高。」惠英紅約滿邵氏後遂離開。惠英紅的新開始並不順利，由高峯滑落的她漸漸患上抑鬱，連家人都不想見：「最差試過幾個月唔離開自己間房，我同家人住村屋，大家讓我住頂層，我唔落去，佢哋同工人都唔會上嚟，佢哋唔知我出埠定喺屋企，而我聽到二樓有聲就唔落去，等冇人就衝落去拎一樽水、拎嘢食。
「最差時將廁所塊鏡封晒，一望鏡就覺得自己醜樣、阻住地球、吸人啲空氣，乜衰嘢都喺個腦度。嗰幾年一塌糊塗，間房臭㗎，我連起身望廁所，急到不得了都冇動力去廁所，刷牙洗臉都冇，只攤喺張床，攤吓又瞓，越瞓越攰。」如是者她過了三年，根據資料顯示，她抑鬱症期間，曾服藥自殺，幸好閨蜜鍾慧冰拉她走出鬼門關。
積極治癒抑鬱症後，惠英紅再戰幕前，有過閱歷，演技更有發揮，她憑《心魔》及《幸運是我》兩奪金像獎影后，又因《血觀音》成為金馬影后，事業再上高峯，只是愛情方面卻一直交白卷。這算是人生遺憾嗎？惠英紅另有一番見解：「人生太多遺憾，當你唔諗，人生就冇遺憾，唔好再去太貪心，再硬要去講冇結婚係遺憾，咁你一定遺憾。做人唔好太貪心，貪心就好多遺憾，諗到好多遺憾，就搞到自己真係好多遺憾，咁就唔開心，何必呢？」
今年7月1日，特區政府公佈授勳名單，惠英紅獲頒銅紫荊星章，她表示感恩：「接到呢個消息時，我喺北京開工，感激唔同界別人士認同我喺電影圈小成就，好大鼓舞。」她還寄語後輩：「我唔係大成就，只不過唔係一個失敗者，遇到任何困難，千祈唔好放棄，淡定就可以解決到。」
記者：比華利
場地：金公館
攝影：林德雄
髮型：James Lee＠HAiR
化妝：littlewhite
回應 (0)
