中環在線：戀戀無期　海之戀遲一季交樓

【蘋果日報】長實（1113）荃灣海之戀去年開賣即成話題，除咗樓盤名肉麻，廣告仲話一刻戀上，無論當時到家陣仲可以登入嘅官方網站都寫明預定關鍵日期，即係入伙期係今年9月30日，唔少讀者早已來郵參加驗樓，預計係呢個時候入伙。殊不知而家就戀戀無期，事關有業主幾日前收到律師行來信講到，荃灣海之戀延期交樓，理由係建築期間嘅惡劣天氣延遲咗有關建築，遲到去明年1月30日，遲一季先交樓。
曾5度被縱火
長實樓遲交樓嘅例子不勝枚舉，基本上次次都係懶個天，例如將軍澳峻瀅2期、元朗世宙等等，其中世宙激到唔少業主火到嚟埋，兩度延遲，遲超過半年，搞到啲業主大失預算，仲搵埋立法會議員出聲。不過睇返資料，海之戀過去1年，5度被縱火，可能多咗一種因素。
一手例規定，發展商如延期6個月後仲未完工，準業主先可以撤銷合約，獲退還付款及利息。其實消委會都批評過呢點，仲建議遲交樓要罰息，但就只聞樓梯響。
李華華
LiWaWa@AppleDaily.com