少買住宅物業　鍾情比華利山

【蘋果日報】【買舖成癮】海天堂鬍鬚佬吳耀明在2011年斥資4,570.3萬元買入大埔比華利山別墅，他稱當年幫發展商撐場，最終變自己入場，「買比華利山係我決定，因為我鍾意喺度住。海景，一上到去，呢間屋係我嘅！好舒服，望出去個海。咁發展商又話畀折頭，又話送傢俬裝修」。
御龍山兩伙轉手賺340萬
不過，搬入大埔比華利山後發生「海天堂911」，吳耀明說：「風水佬話呢度風水唔好，話同911事件有關係嘅。我唔係咁睇，人有高低，做生意梗有變故，但我住喺度，賴呢啲（風水），唔恰當。反而咁多年一家人平安開心，呢啲完全買唔到喎！（樓價未返家鄉？）我又唔係炒，又唔係賣，理得佢幾錢。」
鬍鬚佬當年傾盡積蓄，買入佐敦寶靈街54號地下舖位，多年來都是海天堂分店，1990年以288萬元買入，持貨28年，現升值至少5倍。他多年來買舖當積蓄，先後斥資逾2億元購入至少13間舖，其中6間為海天堂分店，目前市值估計近5億元。多年來鮮有買住宅物業，鬍鬚佬坦言：「我唔鍾意買住宅！」1997年他以523萬元購入元朗錦綉花園一間屋仔，這間屋仔之後轉贈太太細妹，然而2009年卻以328萬元沽出，鬍鬚佬感到無奈：「叫極佢唔好賣，但都係賣咗！」
2009年他以約2,000萬元購入火炭御龍山2伙，先後沽出賺約340萬元，「唔講得賺，擺咗咁耐，如果同等嘅物業，買乜都double以上啦，點會買御龍山，冇得郁嘅。（點解買？）我個女囉!所以我唔鍾意買樓」。