《醜陋的中國人》衝擊石永泰30年

【蘋果日報】小一已經400度近視的資深大狀石永泰，自小已經「書」得喜。童年時父母逢周末逛街，身為獨子的他就獨留書局，培養出閱讀興趣。柏楊筆下《醜陋的中國人》，翻閱30年後仍記憶猶新，慨嘆當時強國未崛起，但書中談及的窩裏鬥與髒吵亂的特質，至今仍適用，認為是時候痛定思痛。
《兒童樂園》與《良友之聲》可算其閱讀啟蒙，大一點開始看英文書，除《The Fifth Horseman》，對描寫英國管家感情的《The Remains of the Day》體會亦深，淡淡的英式哀愁教曉他甚麼是含蓄。
「越正義越鍾意窩裏鬥」
80年代初人人講香港前途，少不免談及中國，殖民治下這位聖若瑟番書仔想了解，「點解啲香港人要移民？啲人驚啲乜？哦，原來係驚共產黨，咁你會好想去了解」。先後翻過《圍城》、《赤地之戀》與《秧歌》，再由《尹縣長》了解文革悲劇故事。
印象最深還是成長期進入的柏楊世界。中四讀《中國人史綱》，大學再看《醜陋的中國人》，後者尤其帶來衝擊，「衝擊在平時好多唔係好覺、好多唔為意嘅嘢，串連起嚟，原來真係中國人特別多」，例如髒吵亂，石指當年外遊便發現，「又係喎，香港人講嘢都係大聲啲、嘈又嘈啲」。其他如欺上瞞下、互相八卦、打小報告及無主見等也有着不同層次的體會，但對窩裏鬥特別感受深，「中國人叻就叻，但逢親一班人一齊，就會內鬥」。
石永泰慨嘆就算窩裏鬥套用於今日香港亦適用，「無論乜嘢政治派系，尤其越正義嘅人，越鍾意窩裏鬥：大家都唔妥大家，大家都唔忿氣大家。呢樣嘢，一定要痛定思痛」。
■記者許偉賢