違泊巴士站被叫走Tesla司機：關你X事

【蘋果日報】一輛Tesla電動車前日被發現公然停泊在大埔文娛中心對開的巴士站，當正巴士站是街邊咪錶位，穿橙衣的司機其後更下車橫過馬路，跑到對面的渣打銀行處理私務，其間巴士無法埋站上落客，事件引起網民熱議，大罵Tesla司機「自私、神憎鬼厭」。
事發前日下午約2時半，不少網民拍下當時的照片，並上傳至社交網站鬧爆Tesla司機。從照片中可見，該輛Tesla停泊於巴士站內，男司機下車離開，沒有使用行人過路設施，直接橫過馬路。而在Tesla後方的巴士則無奈被阻，無法靠站上落乘客。至於另一張照片則見Tesla旁有一男一女，相信兩人準備上車離去，而當時巴士站有大量乘客在排隊等候巴士。
有發帖網民留言指「呢架車係想點？巴士埋站前一秒突然停低，仲要司機都落埋車，行過對面線渣打攞野。全巴士幾十人等你兩個，好意思咩！？」；另一位發帖網民更指司機「俾人叫佢揸走仲話關人X事」。
事件遭大批網民怒斥，批評Tesla司機行為自私，「扭過對面就有位停啦，泊喺到搞到神憎鬼厭，有咩為」、「Send個投訴同相，地點時間畀運輸署啦，有錢就是任性」、「停正喺巴士站添啦!根本就當你哋無到!」。