丁珮：佢鍾意我心地善良

【蘋果日報】鮮有在港露面的丁珮昨到訪《李小龍－動．漫．遊》展覽，捐出李生前卡片作為展品。她憶述，李小龍生前一直想邀請她合演，包括未完成的遺作《死亡遊戲》，但可惜一直未能合作。她又談到不少人將李小龍的死歸咎於她，「佢拍《死亡遊戲》，原來係同我玩，大家將責任推喺我身上，係冇得避免，我唯一可以係做好自己。」
1973年7月20日，李小龍在26歲影星丁珮九龍塘寓所內猝死，當時輿論對其死因有極大爭議。
稱曾為對方指導形象
李小龍在死前一年多，贈丁珮一張卡片，她保留至今，「當時我識佢幾個月，係佢拍《猛龍過江》嗰時，啲人幫佢整咗卡片，佢好開心，（卡片）冇地址冇電話，好簡單，佢貪得意畀張我。」
丁珮說當時她打扮前衞，李拍戲時亦靠她做形象指導，「頭髮我帶佢剪，平時啲衫我帶住佢去買。」當年李小龍一直想邀請她拍戲，可惜一直錯過機會，「佢初時搵我拍《冷面虎》，結果佢冇拍，亦都有搵我拍《龍爭虎鬥》，但我入咗醫院，之後又搵我拍《死亡遊戲》，但結果都係無緣同佢拍戲。」
李逝世45年，丁珮不時思念他，「如果我真係遇到好困難嗰時，有時都會諗吓佢，我當佢係良師益友。」李小龍贈予她的卡片左上方印了「以無法為有法，以無限為有限」字句，丁珮說，李小龍在生時說了很多話，當時她「唔識聽」，至李小龍死後她潛心學佛，才悟出一些哲理。
「好多事都係考驗」，丁珮說李小龍過身時，有人認為她應該「隨佢去」，但她認為不能放棄，「以前我唔鍾意自己，今日研究完（佛法），我知道李小龍點解鍾意我，起碼我心地善良，受過咁多打擊都捱過，所以路係要好好哋行落去。」
■記者周　婷