的士業轟扣分制諮詢唔夠問收多五毛係咪濫收？

【蘋果日報】為打擊的士拒載、兜路和濫收車資等問題，政府提出兩級制罰款及扣分制，最嚴重可判罰款2.5萬元及禁監一年，兩年內扣滿15分或以上更會被「釘牌」半年。新星的士同業聯會會長陳偉明炮轟新制度對同業造成嚴重壓力，不滿政府為懲罰極少數濫收車資的司機就對全個行業多加規管，「要扣分司機就要擔心多樣嘢」。他指現時不少法例有灰色地帶，例如咪錶金額並非「收齊頭」，司機經常無足夠零錢找贖，「收多5毫子係咪濫收車資呢？」
陳偉明指運輸署5月24日曾與的士業界開會介紹新扣分制度，當時已提出要求再次會面詳細討論項目罰則，未料政府昨日即單方面提出將扣分制交予立法會審議，「好突然！第二次諮詢都未有，入面啲嘢都未傾過，就咁掟份嘢畀你叫你睇啦！」
他不滿當局未有釐清目前的法例灰色地帶，「收多5毫子係咪濫收車資呢？條路改咗、行近啲係咪叫兜路呢？」又指過去曾有乘客因為司機找贖時少給5毫子而「玩嘢」，雖然案件鬧上法庭後司機獲律政司撤訴，但陳認為一旦扣分制獲通過是「有投訴途徑畀乘客借題發揮」，又指曾建議准許司機在車廂內安裝閉路電視，當有爭拗時可作為證據，但當局未有接納。被問到會否有抗議行動，陳回應稱「唔一定要去做，問題係政府應該坐底重新同業界開會，講清講楚嗰扣分制，令到啲司機放心去接納」。