ＯＬ開校服派對　多人幫襯

【蘋果日報】消委會報告發現，有兩款中學校服驗出致癌芳香胺，呼籲家長立即停用。其中涉及上水鳳溪第一中學校服的零售商喊冤，指該批校服應是多年前從內地購入的貨源，現時只剩下少量貨尾，憂慮事件令商譽受損。另嶺南中學校服零售商則指，涉事校服的客人並非學生，多數是辦校服派對的OL。
校服零售商「心怡校服」負責人何小姐回覆查詢時指，涉事的校服屬於上水鳳溪第一中學的校服裙，承認公司並非該校的主要校服供應商，「入咗好少貨，擺咗喺閣樓好耐，剩番幾條掛出嚟賣，50蚊一條」。她指，該批校服裙購自內地一間布行，現時不再採用該行布料。
何小姐又斥消委會「搞到雞毛鴨血」，「淨係因為一條腰帶（被指有問題）而上榜……就算真係有乜嘢致癌物，咁都係戴落條腰，唔會死人」，相信事件會令商譽受損。她表示，正考慮將剩下的幾條校服裙扔掉，希望息事寧人。
另一零售商「成順發」負責人姚先生指，已將涉事校服下架，並交由海關處理，承認自兩年前因投標失敗後不再是嶺南中學的校服供應商。他指，該批校服在約6年前從內地廠房，以單一尺碼大批訂購，後來因剩下「貨尾」而個別出售，但兩年內只售出7套，今年亦未有再賣出，購買涉事校服的客人並非學生，多數是辦校服派對的OL。他憂慮事件影響該店商譽，令家長不敢再光顧。
■記者于健民、梁銘恩