遇南亞海嘯倖存「冥冥中自有天意」

【蘋果日報】集會計師、賓架、企業舵手等多重角色一身的尹焰強（Daniel），是數度與生死邊緣擦身而過的倖存者。
三十多歲在半山駕車撞到棵樹，連人帶車「成架翻轉」都無事；剛踏入四十歲不惑之年，確診患癌，病情雖治癒但後遺症到今天仍困擾生活作息；六年後（2004年）在泰國蔻立度假遇南亞海嘯，陰差陽錯酒店擺烏龍，房間由地面變三樓，逃過一劫。
揀蔻立這冷門地點，一則因每年都陪女兒外遊首選陽光與海灘，二則秘書告知，Sofitel號稱有全世界最大泳池，樓高三層獨立別墅，地面一層可從陽台直接跳入泳池，於是一試。豈料抵步後酒店訂房出錯，被迫轉上三樓，「心諗有無搞錯，訂咗都可以畀咗人？」但因當時已入夜，加上饑腸轆轆，唯有翌日才調。
誰知一覺醒來海嘯已殺到，水浸至二樓天花板頂，「啱啱三樓就唔到……如果當晚發脾氣堅持換房，咁就慘嘞，現在可能都見你唔到，你話人生係咪整定既呢？」
數度與死神擦過，他還是一貫淡然。「你問我中咗六合彩會唔會好開心？我諗我都差唔多，（因為你有錢？）係打個比喻；我一向性格淡然啲啩，既來之則安之。」
海嘯後第二年，尹焰強說過，要活在當下珍惜眼前人。可惜病患走過，海嘯也走過，卻未把握住當時的眼前人攜手走下去。09年因家庭狀況有變，剛巧羅康瑞亦向他招手，於是離開東亞銀行（023），轉戰上海。
有無遺憾？「遺憾一定有」，人生兜兜轉轉那能沒遺憾？但感恩與女兒仍保持密切聯繫。回頭望，他覺得每個決定無論對錯，「好多嘢係天時地利人和，唔係話推卸責任……但去到嗰一點你就做咗嗰個決定。」談話間，Daniel頻頻用紙巾拭眼抹鼻。
患癌病癒　仍有後遺症
他忙笑着解釋，「唔好以為我感觸，係癌症治療嘅後遺症。」講得耐會口乾喉嚨不適流眼水，電療亦破壞了他的聲線及聽覺。「好簡單，你問我有無唔開心？梗係唔開心啦，身體好多唔方便，無辦法㗎，唯有接受佢。」
人生學到乜？四個字：變化莫測。「冥冥中自有天意，呢啲唔係灰，我哋呢種叫悲觀中嘅樂觀……難題嚟到，盡你一切辦法去解決，呢個就係人生要走嘅路！」