【姐匙Talk】吹水文借醉抽水落老婆面

【蘋果日報】正所謂有危就有機，喺電視圈出身嘅「吹水文」，雖然近年冇乜戲拍，不過佢勝在計仔多多，自己搞吓跨媒體創作，又同電視台主持節目一樣搵到食。不過，吹水文一向桃花旺盛，除咗離過婚，又同過氣艷星「金牛」拍過拖，只係估唔到佢同出名好戲嘅「四個口」結婚後，依然死性不改。
當眾攬人妻
近日吹水文為免費電視台做主持，有晚同一班台前幕後工作人員飯局兼直落唱K，吹水文仲帶埋佢老婆四個口現身。一向係咪霸嘅吹水文當晚霸住個咪唔在講，飲多兩杯後，仲居然一面攬住人妻主持，一面喺人妻主持耳邊話：「其實你知唔知，你真係好靚，好鬼索嘅箒！」人妻主持當時好尷尬，不過佢又唔夠膽推開大哥級嘅吹水文，只好向其他人打眼色求救。
當時四個口都在場，佢雖然都知自己老公飲醉酒就發癲，未必係有心抽水，不過吹水文眾目睽睽之下咁樣搞法，身為老婆嘅四個口梗係覺得冇面啦。佢雖然扮人多睇唔到，不過都忍唔住即時黑面。好在有其他在場人士見勢色唔對，就同吹水文講：「你飲多咗喇，等阿嫂陪你返屋企休息吓啦！」連隨分開吹水文同人妻主持，然後扶住吹水文落樓上車。吹水文仲唔識死，仲話要同人妻主持唱完首歌先，其他人梗係冇理佢，快手快腳夾佢上車。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。