中環在線：罕有現身論壇　李家傑猛讚「大灣區速度」

【蘋果日報】四叔李兆基大仔、恒地（012）副主席李家傑一向低調，只係鍾意打理吓自己生意，不過佢噚日罕有以一國兩制研究中心主席嘅身份出席「亞洲商貿論壇」，但當然唔好expect佢好似「超人」李嘉誠咁金句多多，都係講吓大孖沙第二代最鍾意講嘅大灣區啫。
話產業鏈非常完善
李家傑話，大灣區產業鏈非常完善，由科研、設計、零件、生產都可以喺區內完成，加埋香港可以做收購合併、上市融資，全球冇一個地區可以咁流暢同快捷，佢叫呢個做「大灣區速度」，真係唔知大灣區跑得快啲，定保特跑得快啲。
其實李家傑嚟撐場都唔係冇迹可尋，話說呢個論壇由星展香港贊助，而星展大公關朱伊蓮老公，就係一國兩制研究中心總裁張志剛，咁啊張生搵到主席撐場係理所當然，噚日兩公婆都難得同枱一齊出席呢個活動。
李華華
LiWaWa@AppleDaily.com