80後首置客撻定　告經紀誤導索償斥對方稱「一定可造八成按揭」

【蘋果日報】【周末專題】80後新婚首置客720萬元買大圍新盤薈蕎一房戶，惟發展商提供按揭公司不批八成按揭，最終撻定損失逾36萬元，及後向一手銷監局及地監局投訴美聯物業經紀落定前實牙實齒表示「一定可造八成按揭」惟最終不批，以及教唆偽造文件，務求讓已退休無收入的外父成為按揭擔保人，並委聘律師循民事訴訟追討賠償。地監局已正展開調查。
記者：陳家雄
新婚80後買家欲置業，數月前途經尖沙嘴被經紀游說購買宏安（1243）沙田大圍新盤薈蕎，多年來儲蓄200萬元，相信有能力置業，最後被屋苑綠化環境及交通便利吸引。他接受訪問時表示，街頭美聯經紀介紹認識該行經紀梁，之後帶到薈蕎售樓處，第一天經紀梁表示代客墊支一半留住單位，當時已經晚上8時多未決定。翌日再回售樓處，當時向經紀梁表示：「我哋入息3萬頭，佢（經紀）話呢個冇問題，話介紹按揭公司畀我哋，會幫我哋做到八成按揭……但我哋最擔心做唔做到八成按揭，然後佢話實做到啦，點會做唔到，呢個冇問題，仲有乜好考慮。其實我哋表明咗好幾次，擔心呢樣嘢，佢當時睇我哋入息，喺度計數，計計吓話ok……冇問題啦……實牙實齒話冇問題。」
他補充指，期間身份證被取以作留單位之用，甚至去廁所小便，經紀梁都企在隔籬，即也要在女廁所外守候。
之後他購入一個實用389方呎一房戶，成交價720萬元，臨約定金逾36萬元。從未買過樓，但都有計過數，「如果做到八成按揭，係供得起。首期連雜費約170萬，我哋有200萬，仲有30萬流動資金去應付突如其來嘅事，唔會供唔到一個月就拜拜。我哋有準備，借八成月供2.1萬，兩公婆節食縮食，現時一個月都使唔夠一萬，每個月都有剩。」
簽臨約後要求經紀梁提供按揭公司聯絡方法，但遲遲未覆，直到簽約翌日才提供聯絡方法。及後該按揭公司致電回覆表示，八成按揭月入須達5.2萬元。他感到突然：「完全冇諗過同經紀講嘅嘢咁大出入。如果一開始話要五萬幾入息，就知道唔使諗啦，唔使簽約！追問經紀梁：『之前又話做到八成嘅？』跟住佢話無講過。咁就知大鑊啦！嗰陣冇戒備，冇證明佢有咁講過，覺得好似中圈套。」
另一經紀教唆偽造文件
他到經紀梁代理行算賬，再轉介另一名經紀林，經紀林教唆他們偽造文件，將外父自住單位出租給他老婆，令已退休外父有收入，藉以符合擔保人的資格，今次有備而來，整個過程錄音。他表示：「好奇怪，似呃人，照咁做，如果犯法越踩越深……唔想一錯再錯。」
最終他無理會經紀林的建議，惟時間緊逼，籌不到錢便撻定，他皺眉道：「當時好無助，唔知應該同邊個講，屋企人都已經做唔到擔保人，我哋係得咁多，突然要嘔多一百幾十萬，屋企人都幫唔到自己。朋友？香港地每個人都想買樓，佢哋都未買樓，又點會幫我買樓呢？最後撻定，好失望，辛苦儲咁耐嘅錢，一下子俾人整走咗。」
被問是否有責任做好功課，他回應：「第一次買樓，無戒備心要去防人。因為呢間是係一間好大嘅地產代理公司……無諗過原來大型公司隨便氹啲客去買，甚至是呃我哋去買。未買過樓，原來咁多程序。」且已計過現有200萬元，付首期後仍有約30萬元後備資金，月供約2.1萬元，職業穩定，兩公婆短期不打算生育，當時經紀梁又斬釘截鐵話「做咗咁多年」，信他的經驗，沒料到後來出爾反爾。他現已去信一手銷售局及地監局投訴，希望追討辛苦儲回來的錢。
美聯：無提供違規建議
美聯物業回應指就上述個案，據悉本司職員已向客人提供按揭及壓力測試資料供參考，而發展商亦有提供不同類型按揭計劃，但一切仍需以銀行或發展商批核作準，而客人是在簽臨約翌日便決定自行取消交易。另外，職員未有就是次個案提供違規建議。重申公司重視員工操守，如發現有任何違規行為，會嚴肅處理。