【電影大師班】《大追捕》導演周顯揚「晶哥嘅戲都要睇」

【蘋果日報】【電影大師班】為咗力求進步，繼彭浩翔、杜汶澤等之後，再請嚟導演周顯揚同《蘋果》同事分享拍攝製作心得。
導演周顯揚憑《殺人犯》獲第29屆香港電影金像獎新晉導演提名，憑《大追捕》獲第32屆香港電影金像獎新晉導演獎，仲係著名導演李安嘅徒弟，周顯揚話當年都係偷師，「05年好幸運同李安合作，佢係一個大師嚟嘅，佢好善於挖掘人性，同埋佢對人好有興趣。」周顯揚話拍戲又好，拍短片又好，首要條件係對人有興趣，有好奇心，「拍片得一樣嘢，就係同人溝通，而點樣拍得更加有戲劇性，我覺得人離唔開眼睛，要捕捉拍攝對象嘅眼神。」
周導演即場睇咗幾條動新聞，有深入採訪嘅故事，亦有搞笑式報道，周導演尤其讚賞我哋嘅同事演技唔錯！有同事問佢，「究竟條橋重要，定係畫面質素重要呢？」周顯揚以搞笑動新聞為例，認為喜劇嘅畫面無需要造作，否則會影響笑位，「你見周星馳啲片，佢淨係要條橋之嘛，鏡頭最好唔好咁複雜，但係如果係新聞專題，好似紀錄片，對畫面要求就會高啲！」
周顯揚分享以往嘅拍攝經驗，「以前拍戲用菲林，我都要隔兩日先知拍咗乜，對攝影師要求當然好高，但係o依家揸住iPhone已經有4K拍攝，所以橋同畫面，我認為人腦、橋、題材，係無得取代。」
承繼橋定畫面嘅問題，有同事又提出，有時有橋，但無畫面配合，都好煩惱，周顯揚就建議睇多啲戲，「如果拍搞笑嘅片，睇差利卓別靈嘅戲，睇晒佢，周星馳喺度都唔會否認，我諗佢都係煲差利。」提到喜劇，點可以唔提「晶哥」王晶呢，周顯揚坦誠佢有睇，「晶哥都要睇㗎！我喺飛機都睇《賭城風雲》，咩都睇，鍾意唔鍾意都好，我返屋企都睇衛斯理，一定有嘢睇到嘅！」