近港鐵站樓下有街市

【蘋果日報】遠展（035）大圍新盤珀玥硬銷接近港鐵大圍站，事實上僅數分鐘步程，且生活配套一應俱全。雖然樓盤對出是八號幹線，但已採用隔音屏障。
毗鄰八號幹線
珀玥位於大圍美田路28號，由大圍站A出口步行穿過富嘉花園及金禧花園就抵達樓盤現場，實時計約7分鐘，由大圍站D出口直行會更快。抵達樓盤前經過賣肉、菜及生果的地舖，生活配套一應俱全，但有街坊也認為，樓盤近街市，老鼠曱甴特別多。而且位於大圍市中心，舊樓橫街小巷食肆林立，多不勝數，著名食肆如沙田強記雞粥等等，不愁無啖好食。
不過，街坊吳太認為美中不足是：「呢度無大型商場，無幾多間舖可以行下呢，麥當勞都無一間，百佳都執咗笠。」
現場可見，雖然樓盤對出見八號幹線，距離不足100米，但幹線已安裝隔音屏障。反而，大門對出美田路車輛絡繹不絕，繁忙時段車輛噪音較為明顯。珀玥處小學88校網，學校包括沙田官立小學、宣道會陳元喜小學等。
街坊心聲
吳太：「400幾萬一層樓，睇你做咩工囉，食餐飯都六七十蚊，仲要無嘢飲，有嘢飲要八九十蚊，你睇香港開支幾大！」
崔先生：「離晒譜！脫晒節！2萬幾蚊一呎，大佬，一個月人工都買唔到一呎，點頂呀！打工仔邊到買得起呀！」